Mae teulu bachgen 13 oed a fu farw ar ôl gwrthdrawiad yng Nghwm Cynon wedi dweud y byddan nhw’n parhau i frwydro am gyfiawnder.

Daw wedi iddyn nhw ennill apêl i ymestyn dedfryd gyrrwr y cerbyd a wnaeth ei ladd. 

Bu farw Kaylan Hippsley o Hirwaun yn dilyn y gwrthdrawiad ar Heol Aberhonddu ar 29 Chwefror.

Fe gafodd Harley Whiteman, oedd yn 19 oed ar y pryd, ei ddedfrydu i chwe blynedd a naw mis yn y carchar ym mis Ebrill, yn ogystal â’i atal rhag gyrru am wyth mlynedd a phedair mis. 

Roedd Mr Whiteman wedi gwrthdaro â Kaylan Hippsley tra'r oedd ef a’i ffrindiau yn cerdded i ganolfan lleol. 

Mewn neges ar y cyfryngau cymdeithasol, cyhoeddodd Debbie Winter, sydd yn fam i un o chwiorydd Kaylan, bod y teulu wedi llwyddo yn eu hapêl i ymestyn dedfryd Mr Whiteman i naw mlynedd. 

“Hoffwn roi gwybod i bawb ein bod wedi ennill ein hapêl… y ddedfryd newydd ydy naw mlynedd ac mi fydd e’n treulio chwe blynedd yn y carchar," meddai. 

“Dyw hyn dal ddim yn ddigon a dyw e ddim chwaith yn adlewyrchu gwerth bywyd Kaylan, ond mae’n lot gwell na thair blynedd a hanner. 

“Hoffwn ddiolch i bawb am eu cefnogaeth, cariad a gofal yn ystod y cyfnod heriol yma ac mi fyddwn ni’n parhau gydag ein deiseb er mwyn diogelu bywydau."

Fe ddechreuodd teulu Kaylan y ddeiseb wedi'r gwrthdrawiad gan alw am gyflwyno cyfraith newydd o'r enw Cyfraith Kaylan, a fyddai'n golygu cynyddu’r isafswm ar ddedfrydau am achosi marwolaeth drwy yrru’n beryglus.

'Gyrru'n beryglus'

Fe gafodd dedfryd Mr Whiteman, 20 oed, ei ymestyn i naw mlynedd yn Llys y Farn Frenhinol yn Llundain ddydd Mercher. 

Bydd yn cael ei atal rhag gyrru am 11 mlynedd yn ogystal. 

Clywodd y llys fod Mr Whiteman wedi yfed pedwar peint o alcohol mewn dau dafarn lleol, a’i fod dan ddylanwad cocên, cyn iddo daro Kaylan Hippsley. 

Dywedodd Kelly Brocklehurst, oedd yn cynrychioli’r cyfreithiwr cyffredinol, wrth y llys fod Mr Whiteman wedi bod yn gyrru ar “gyflymder oedd yn hynod amhriodol” ar gyfer pentref. 

Dywedodd fod Mr Whiteman wedi cyrraedd cyflymder o 60mya. Terfyn cyflymder yr ardal oedd 20mya. 

Clywodd y llys fod Mr Whiteman hefyd wedi gadael safle’r gwrthdrawiad cyn dychwelyd ar draed. 

Roedd hefyd wedi gwrthod profion gwaed i'r heddlu wedi’r digwyddiad.