Mae Wrecsam wedi arwyddo cyn-gapten Charlton Athletic George Dobson ar gytundeb tair blynedd.

Fe benderfynodd y chwaraewr canol cae 26 oed adael Charlton yr haf hwn ac roedd disgwyl iddo symud i glwb Hwngari Fehérvár.

Ond fe dynnodd allan oherwydd amgylchiadau personol.

Chwaraeodd Dobson yn flaenorol o dan bennaeth Wrecsam Phil Parkinson yn Sunderland.

Dywedodd George Dobson: “Rwyf wrth fy modd. Dyma’r clwb yn yr EFL y mae pawb eisiau dod iddo a phan gefais y cyfle i ymuno roedd yn gyffrous.

“Pan siaradais i â’r gaffer, a dangosodd ei ddiddordeb roedd yn teimlo fel cyfle na allwn ei wrthod.

“Alla i ddim aros i gwrdd â’r holl gefnogwyr a gobeithio parhau â llwyddiant y clwb a chael tymor pleserus.”

Inline Tweet: https://twitter.com/Wrexham_AFC/status/1809603460326719534

Dechreuodd Dobson ei yrfa ieuenctid gydag Arsenal a West Ham a threuliodd amser yn Sparta Rotterdam cyn cyfnod o 18 mis yn Walsall, lle bu ar fenthyg o'r blaen.

Symudodd Dobson i Sunderland yn 2019 a chafodd gyfnod benthyg gyda AFC Wimbledon yn 2021 cyn iddo symud i Charlton.

Cafodd ei ddewis fel Chwaraewr y Flwyddyn Charlton yn 2021-22 ac fe gafodd ei enwi’n gapten y tymor canlynol.

Dywedodd rheolwr Wrecsam Phil Parkinson: “Mae George yn chwaraewr gwych i ni. 

“Mae wedi datblygu’n dda iawn fel chwaraewr ac mae’n rhywun rydyn ni wedi adnabod amdano ers tro.

“Mae’n chwarae gyda phersonoliaeth go iawn; mae’n gymeriad gwych i’w gael yn yr adeilad ac mae wedi bod yn gapten ar Charlton o’r blaen.

“Mae ansawdd arweinyddiaeth yn y grŵp mor bwysig a bydd George yn sicr yn dod â hynny.”