Bydd Cymru yn dechrau ar eu hymgyrch yng Nghwpan Dartiau’r Byd yn Yr Almaen ddydd Sadwrn ond ni fydd Gerwyn Price yn chwarae.

Ychydig ddyddiau cyn i'r gystadleuaeth gychwyn roedd y Professional Darts Corporation (PDC) wedi dweud bod Price wedi tynnu allan oherwydd "problemau iechyd."

Jim Williams fydd yn cymryd ei le ac ef fydd yn bartner i Jonny Clayton yn y gystadleuaeth.

Mae eu gêm gyntaf yn erbyn Croatia nos Wener.

Dywedodd Price, sydd yn safle rhif pedwar ar restr detholion y byd ei fod yn "siomedig i fethu'r gystadleuaeth" a'i fod "bob tro yn caru cynrychioli Cymru."

Yn ôl Dylan Williams, sefydlydd y wefan Darts Cymru, fydd ei golled yn ergyd mawr i obeithion y wlad o gipio’r tlws.

"I golli Gerwyn, ma' gobeithion Cymru nawr wedi lleihau tipyn bach bydden i'n gweud," meddai wrth Newyddion S4C.

"I golli unrhyw chwaraewr o fewn diwrnodau cyn cychwyn yr ymgyrch bydde'n glatshen i unrhyw un. Ond i ni o ran y Cymry, 'drycha di ar ei brofiad e, y llwyddiant yn y gystadleuaeth yma a'r meddylfryd 'ma o'r enillydd.

"Mae'n ergyd masif rili."

Hanes Cymru yng Nghwpan y Byd

Mae Cymru wedi ennill y gystadleuaeth ar ddau achlysur, yn 2020 ac yn 2023.

Maen nhw wedi cyrraedd y rownd derfynol ar dri achlysur hefyd, yn 2010, 2017 a 2022.

Un gêm yn unig mae Cymru wedi colli yn y gystadleuaeth pan mae Jonny Clayton a Gerwyn Price yn chwarae gyda'i gilydd, gan ennill 13.

Image

Mae Dylan Williams yn cymharu colled Gerwyn Price fel tîm pêl-droed Cymru yn colli Gareth Bale.

"Mae e'r un peth a 'se Gareth Bale yn tynnu mas o 'whare i Gymru noson cyn gêm yng Nghwpan y Byd.

"Mae'r ergyd yr un faint mor fawr â hynny, ti'n colli rhywun sydd medru ennill gêm ar ben ei hunain."

Pwy yw Jim Williams?

Mae Jim Williams yn safle rhif 44 yn rhestr detholion y byd ac yn chwaraewr profiadol.

Dechreuodd y gŵr 39 oed ei yrfa yn y byd dartiau yn 2004 ac wedi ennill nifer o gystadlaethau ar hyd y blynyddoedd.

Nid yw'n estron i wisgo crys Cymru chwaith, gan gynrychioli ei wlad mewn nifer o gystadlaethau gwahanol.

Image

"Ma' tipyn o hanes a ma' tipyn o brofiad gyda Jim," meddai Dylan Williams.

"Mae 'di ennill un gystadleuaeth yn y PDC, sydd yn tipyn o beth dyddiau yma achos ma'r safon ar draws y gylchdaith yn anhygoel.

"O ran ei brofiad e yn y British Darts Organisation (BDO), mae wedi cyrraedd ffeinal Pencampwriaeth y Byd fan 'ny, felly mae'n tipyn o foi i allu gwneud 'ny.

"Mae hefyd wedi cynrychioli Cymru dwsinau o weithiau yn gwahanol cystadlaethau yn y BDO, felly mae'r pwysau 'na o wisgo'r crys coch yn beth fydd e'n gyfarwydd gyda, er penwythnos 'ma yn amlwg fydd lot fwy o lygaid arno fe."

Cymru i gipio'r tlws am y trydydd tro?

Yn wahanol i gystadlaethau arferol, mae gwledydd yn chwarae pob gêm mewn parau yng Nghwpan y Byd.

Eleni bydd y tro cyntaf i Jonny Clayton a Jim Williams chwarae gyda’i gilydd, felly beth yw eu gobeithion o ennill y gystadleuaeth?

"Pan ma rhywun yn gwybod bod nhw'n 'whare Gymru ma' nhw'n gwbod bod nhw mewn am dipyn o gêm," meddai Dylan.

"Mae'n gêm gwbl wahanol achos fel arfer o 'whare fel unigolyn bydde ti'n twlu lot mwy aml. Fan hyn nawr ma' rhaid ti aros pob tair throw er mwyn twlu dy ddartiau.

"Ond i fi'n gweld e mwy 'na'r gallu twlu 'ma yw'r perthynas a'r gemeg rhwng y chwaraewyr.

"Yn amlwg, dyw Jim ddim yn mynd i gallu llenwi sgidiau Gerwyn achos ma'r perthynas 'na rhwng fe a Jonny ma' nhw fel brodyr, ma' nhw 'di creu bond cryf iawn dros y blynyddau.

"Os galle Jim a Jonny creu'r berthynas 'ma, bod Jonny nawr yn cymryd y rôl fel y  capten, yn 'whare’n dda o dan bwysau, gobeithio bydd hynny'n galluogi Jim i jyst i 'whare gêm ei hunain a bod ni'n gweld nhw'n cryfhau fel bod nhw'n mynd trwy'r rowndiau."

Prif lun: Wochit