Mae dyn 31 oed o ardal Wrecsam wedi’i gyhuddo o dreisio.

Cafodd digwyddiad ei adrodd i Heddlu Gogledd Cymru yn ardal Cefn Mawr yn oriau mân fore Llun 24 Mehefin.

Yn dilyn ymchwiliad gan yr heddlu, cafodd Daniel Stevie Evans, o Stryd y Ffynnon, Cefn Mawr, ei arestio mewn cysylltiad â’r digwyddiad ac mae wedi’i gyhuddo o dreisio.

Mae dyn 28 oed o’r tu allan i ardal yr heddlu, a gafodd ei arestio hefyd mewn cysylltiad â’r digwyddiad, wedi’i ryddhau ar fechnïaeth.

Cafodd Mr Evans ei gadw yn y ddalfa cyn ymddangos o flaen Llys Ynadon yr Wyddgrug fore dydd Iau.

Fe fydd yn ymddangos yn Llys y Goron Yr Wyddgrug ddydd Gwener.

Mae'r Ditectif Arolygydd Cefyn Roberts o'r llu yn gofyn i unrhyw un a welodd y digwyddiad i gysylltu â'r heddlu.

“Rydym yn parhau i apelio ar unrhyw un oedd yn ardal y gylchfan ger Tesco yng Nghefn Mawr tua 6am fore Llun i gysylltu â ni drwy’r wefan, neu drwy ein ffonio ar 101, gan ddefnyddio’r cyfeirnod 24000555032.”

Llun: Google