Mae dau blentyn yn ddiogel wedi ymgyrch chwilio ar arfordir Sir Benfro brynhawn dydd Gwener.

Cafodd gwasanaethau brys eu galw i ardal Abereiddi, ardal sy'n boblogaidd ar gyfer gweithgareddau awyr agored, wedi adroddiadau bod y ddau blentyn ar goll yn ystod taith arfordira (coasteering).

Dywedodd Gwylwyr y Glannau Abergwaun eu bod wedi cael eu galw am 14:53 i gynorthwyo Heddlu Dyfed-Powys.

Cafodd timau Gwylwyr y Glannau Abergwaun a Thyddewi eu hanfon i'r ardal, ynghyd â bad achub RNLI Tyddewi a hofrennydd achub Gwylwyr y Glannau.

Mae cofnodion yr RNLI yn dangos bod bad achub Tyddewi wedi lansio am 14:50.

Tra oedd y gwasanaethau brys ar eu ffordd, daeth cadarnhad bod y ddau blentyn wedi eu canfod yn ddiogel ac yn iach.

Daeth yr ymgyrch chwilio i ben wedi hynny.