Mae Heddlu'r De'n parhau i gynghori pobl i gadw draw o leoliad yng Nghaerdydd ar ôl i "ordnans" gael ei ddarganfod yno ddydd Iau.

Cafodd y ddyfais ffrwydrol ei darganfod ar y lan wrth ymyl Rover Way ger Y Sblot.

Dywedodd Heddlu De Cymru ddydd Gwener fod cordon yn parhau yn ei le, a bod swyddogion arbenigol yn ymchwilio'r ddyfais sydd "ychydig ddegawdau oed".

Mae'r swyddogion yn pwyso a mesur eu camau nesaf.

Ddydd Iau fe rybuddiodd yr heddlu y gallai trigolion glywed ffrwydradau ac nid oedd unrhyw reswm iddynt ddychryn.