Mae’r Prif Weinidog wedi penodi aelod newydd i’w gabinet ddydd Gwener ar ôl diswyddo Hannah Blythyn.

Dywedodd Vaughan Gething ei fod wedi penodi Sarah Murphy, yr Aelod o Senedd Cymru dros Ben-y-bont ar Ogwr, yn Weinidog Partneriaeth Gymdeithasol.

Roedd hi wedi cefnogi Jeremy Miles yn ystod ras awenyddol y Blaid Lafur.

Daw hyn wedi i Vaughan Gething ddweud ddydd Iau ei fod wedi gofyn i Hannah Blythyn, , yr Aelod o Senedd Cymru dros etholaeth Delyn, i adael y llywodraeth “ar ôl adolygu’r dystiolaeth sydd ar gael i mi ynghylch y datgeliad diweddar o gyfathrebu i’r cyfryngau”.

Mewn datganiad dywedodd Hannah Blythyn ei bod hi wedi ei “syfrdanu” a’i “thristau'n fawr” gan y penderfyniad hwnnw.

Gwadodd rannu gwybodaeth â’r wasg gan ddweud mai “uniondeb (integrity) yw popeth mewn gwleidyddiaeth ac rydw i wedi cadw gafael arno”.

‘Uchelgeisiol’

Mewn datganiad dydd Gwener dywedodd Vaughan Gething: "Mae’n bleser gennyf gyhoeddi penodiad Sarah Murphy yn Weinidog Partneriaeth Gymdeithasol.

“Bydd Sarah yn bwrw ymlaen â’n gwaith parhaus gyda’n partneriaid cymdeithasol gwerthfawr, yn ogystal â darparu arweinyddiaeth ar gyfer ein sectorau creadigol, lletygarwch, twristiaeth a manwerthu.

“Croesawaf Sarah yn gynnes i’m tîm Cabinet talentog ac uchelgeisiol.”

Mewn datganiad fore dydd Iau, roedd wedi dweud: “Ar ôl adolygu’r dystiolaeth sydd ar gael i mi ynghylch y datgeliad diweddar o gyfathrebu i’r cyfryngau, yn anffodus rwyf wedi dod i’r casgliad nad oes gennyf ddewis arall ond gofyn i Hannah Blythyn adael y Llywodraeth.

"Hoffwn gofnodi fy niolch am y gwaith y mae’r Aelod dros Delyn wedi’i arwain yn y Llywodraeth ers 2017, yn fwyaf nodedig ei harweinyddiaeth ar Gynllun Gweithredu LGBTQ+ Cymru, yr adolygiad o’r gwasanaethau tân ac achub, a’n gwaith gwerthfawr gyda phartneriaid cymdeithasol."

Mewn wrth ymateb dywedodd Hannah Blythyn ei bod hi wedi ei “syfrdanu” a’i “thristau'n fawr” gan y penderfyniad. 

“Rwy'n glir ac wedi bod yn glir na wnes i, ac nid wyf erioed wedi rhannu dim," meddai.

“Uniondeb yw popeth mewn gwleidyddiaeth ac rydw i wedi cadw gafael arno.

“Mae’n fraint aruthrol i blentyn o Gei Connah wasanaethu’r gymuned a’m lluniodd, heb sôn am fod wedi gwasanaethu yn llywodraeth fy ngwlad.