Nid yw Prif Weinidog Slofacia Robert Fico bellach mewn cyflwr sy’n bygwth bywyd ar ôl cael ei saethu sawl gwaith ddydd Mercher, meddai dirprwy brif weinidog y wlad.

Dywedodd Tomas Taraba wrth y BBC bod llawdriniaeth Mr Fico wedi mynd yn "dda" a "dwi'n meddwl y bydd yn goroesi yn y diwedd".

Yn gynharach ddydd Mercher dywedodd y Gweinidog Amddiffyn, Robert Kalinak fod Mr Fico yn "brwydro am ei fywyd" ar ôl cael ei anafu'n ddifrifol mewn ymosodiad yn nhref fechan Handlova yng ngorllewin Slofacia

Cafodd person a ddrwgdybir sy'n gyfrifol ei gadw yn lleoliad y digwyddiad.

Yn dilyn y saethu, cafodd y prif weinidog ei ruthro i'r ysbyty a threuliodd sawl awr yn derbyn llawdriniaeth wrth iddo "ymladd am ei fywyd", yn ôl y gweinidog amddiffyn a siaradodd mewn cynhadledd newyddion tu allan i'r ysbyty lle'r oedd Mr Fico yn cael ei drin ddydd Mercher.

Does dim diweddariad swyddogol wedi bod ar gyflwr y prif weinidog ers hynny, ond mae'r dirprwy brif weinidog wedi dweud wrth y BBC nad oedd Mr Fico "mewn sefyllfa lle mae ei fywyd yn y fantol ar hyn o bryd".

“Hyd y gwn i, aeth y llawdriniaeth yn dda ac rwy’n meddwl y bydd yn goroesi yn y diwedd,” meddai Mr Taraba.

Ychwanegodd fod y prif weinidog wedi ei saethu "o bellter agos iawn" a bod "un fwled wedi mynd trwy'r stumog a'r ail yn taro'r cymal".

Nid yw'r heddlu wedi datgan enw'r unigolyn y maen nhw'n credu sydd yn gyfrifol.

Mae adroddiadau heb eu cadarnhau yn y cyfryngau lleol yn dweud ei fod yn awdur ac yn actifydd gwleidyddol 71 oed.