Mae Prif Gwnstabl Heddlu Dyfed Powys wedi canmol staff, disgyblion, a’r teulu ysgol ehangach am eu "hymateb trawiadol" i’r digwyddiad yn Ysgol Dyffryn Aman ddydd Mercher.

Mae'r heddlu wedi dweud y bydd rhagor o swyddogion ar ddyletswydd yn yr ardal dros y penwythnos wrth i ymchwiliadau'r llu barhau.

Mewn llythyr a anfonwyd ar y cyd â’r Comisiynydd Heddlu a Throsedd, Dafydd Llywelyn, dywedodd Richard Lewis: “Mae yna ymchwiliad byw o hyd ac er bod yn rhaid i ni wrth gwrs fod yn ofalus i beidio â pheryglu’r gwaith hwn, mae arwyddion cynnar yn dangos bod ymateb uniongyrchol eich staff a’ch disgyblion yn haeddu canmoliaeth sylweddol.

“Rwy’n ymwybodol bod rhai disgyblion a staff wedi cael eu cynnwys yn fwy uniongyrchol nag eraill ac rwy’n siŵr y bydd amser priodol yn y dyfodol i gydnabod yn swyddogol y rhan a chwaraewyd ganddynt wrth ddod â’r digwyddiad i ben.

“Mae fy nghanmoliaeth hefyd yn estyn i deuluoedd disgyblion a staff sy’n mynychu’r ysgol a’r ffordd dawel a phwyllog yr oeddent yn aros yn amyneddgar am newyddion yn dilyn y digwyddiad. 

"Yr ymateb oedd ymdrech ‘gymuned gyfan’ go iawn yn nhraddodiadau gorau gorllewin Cymru.”

Mae Heddlu Dyfed-Powys wedi cadarnhau mai Fiona Elias a Liz Hopkin oedd y ddwy athrawes a gafodd eu trywanu yn yr ysgol ddydd Mercher. 

Fe gafodd plentyn yn ei arddegau ei drywanu hefyd, ac fe gafodd y tri eu rhyddhau o'r ysbyty ddydd Iau. 

Fe wnaeth merch 13 oed ymddangos o flaen Llys Ynadon Llanelli fore Gwener wedi ei chyhuddo o geisio llofruddio tri o bobl yn dilyn y digwyddiad.

Cafodd y ferch ei chadw mewn sefydliad ieuenctid yn dilyn y gwrandawiad.

Cafodd yr achos ei drosglwyddo i Lys y Goron Abertawe lle bydd y ferch yn ymddangos ar 24 Mai.