Mae Wcráin wedi dechrau defnyddio taflegrau sy'n teithio pellter hir a ddarparwyd yn gyfrinachol gan yr Unol Daleithiau yn erbyn lluoedd Rwsia, yn ôl swyddogion o America. 

Roedd yr arfau yn rhan o becyn cymorth $300m (£240m) a gymeradwywyd gan Arlywydd yr Unol Daleithiau Joe Biden ym mis Mawrth eleni.

Mae'r taflegrau - sydd yn gallu cyrraedd pellteroedd o hyd at 300km (186 milltir) - eisoes wedi cael eu defnyddio o leiaf unwaith i daro maes awyr Rwsia yn Crimea, yn ôl adroddiad gan asiantaeth newyddion Reuters.

Mae Mr Biden bellach wedi arwyddo pecyn cymorth newydd $61bn ar gyfer Wcráin.

Yn flaenorol, rhoddodd yr Unol Daleithiau fersiwn oedd yn teithio pellter canolig o Systemau Taflegrau Tactegol y Fyddin (ATACMS) i Wcráin ond roedd wedi bod yn amharod i anfon unrhyw beth mwy pwerus, yn rhannol oherwydd pryderon ynghylch cyfaddawdu parodrwydd milwrol yr Unol Daleithiau.

Fodd bynnag, roedd Mr Biden wedi rhoi'r golau gwyrdd yn gyfrinachol i anfon y taflegrau pellter hir ym mis Chwefror.

“Gallaf gadarnhau bod yr Unol Daleithiau wedi darparu ATACMS ystod hir i Wcráin ar gyfarwyddyd uniongyrchol yr arlywydd,” meddai Vedant Patel, llefarydd ar ran y wladwriaeth.

“Ni chyhoeddodd [yr Unol Daleithiau] hyn ar y dechrau er mwyn cynnal diogelwch gweithredol ar gyfer Wcráin yn ôl eu cais."

'Gwneud y byd yn fwy diogel'

Ar hyn o bryd, nid yw'n glir faint o'r arfau sydd eisoes wedi'u hanfon.

Ond dywedodd Cynghorydd Diogelwch Cenedlaethol yr Unol Daleithiau, Jake Sullivan, fod Washington yn bwriadu anfon mwy.