Tywysoges Cymru yn derbyn triniaeth am ganser
22/03/2024
Mae Palas Kensington wedi cadarnhau fod Tywysoges Cymru yn derbyn triniaeth am ganser ar hyn o bryd.
Dywedodd y palas ddydd Gwener ei bod wedi dechrau derbyn triniaeth cemotherapi fis diwethaf.
Fe gafodd y canser ei ddarganfod mewn profion a gafodd eu gwneud ar ôl iddi dderbyn triniaeth ar yr abdomen ym mis Ionawr.
Nid yw'r math o ganser wedi cael ei ddatgelu ar hyn o bryd.
Inline Tweet: https://twitter.com/newyddions4c/status/1771236626506698794?s=46&t=ORPiUkmNH3sLBy4-_vkwDA
Mewn neges bersonol, dywedodd y Dywysoges: "Mae hyn wedi bod yn dipyn o sioc, ac mae William a minnau wedi bod yn gwneud popeth o fewn ein gallu i brosesu a rheoli hyn yn breifat er lles ein plant ifanc.
"Fel y gallwch ddychmygu, mae hyn wedi cymryd amser. Mae wedi cymryd amser i mi wella o lawdriniaeth fawr er mwyn dechrau fy nhriniaeth. Ond yn bwysicach oll, mae wedi cymryd amser i egluro popeth i George, Charlotte a Louis mewn ffordd sy'n addas iddynt, ac i dawelu eu meddwl fy mod i am fod yn iawn.
"Fel dwi wedi ei ddweud wrthynt, dwi'n cryfhau bob dydd ac yn canolbwyntio ar y pethau a fydd yn fy helpu i wella; yn fy meddwl, fy nghorff a fy ysbryd."
Cyhoeddodd Palas Kensington ym mis Ionawr fod Catherine Middleton yn yr ysbyty wedi iddi dderbyn triniaeth ar yr abdomen.
Yn ôl y palas, roedd y driniaeth yn llwyddiannus ac fe arhosodd yn yr ysbyty am 10 i 14 diwrnod.
Cyhoeddodd Palas Buckingham ym mis Ionawr hefyd fod y Brenin Charles wedi cael gwybod fod ganddo ganser.
Cafodd y canser ei ddarganfod yn ystod ei driniaeth ddiweddar ar y prostad, ond nid yw wedi cael diagnosis canser y prostad.
Yr ymateb o Gymru
Wrth ymateb i'r newyddion, dywedodd Prif Weinidog newydd Cymru, Vaughan Gething: "Trist iawn clywed y newyddion am Dywysoges Cymru.
"Ar ran pobl ledled Cymru, hoffwn anfon pob dymuniad gorau a'n cefnogaeth at y Dywysoges a'i theulu yn ystod yr amser anodd iawn yma.
"Mae ein meddyliau gyda chi wrth i chi barhau â'ch triniaeth."
Dywedodd Andrew RT Davies, Arweinydd y Ceidwadwyr Cymreig: "Rwy'n anfon fy nymuniadau gorau iddi am wellhad llwyr a buan.
"Mae fy meddyliau gyda'r Teulu Brenhinol i gyd ar adeg sydd wedi bod yn anodd iawn."
Dywedodd Rhun ap Iorwerth, Arweinydd Plaid Cymru: "Mae creulondeb canser yn cyffwrdd bywydau nifer o deuluoedd.
"Ar ran Plaid Cymru, rwy'n estyn fy nghydymdeimladau a dymuniadau gorau i'r Dywysoges mewn cyfnod a fydd yn anodd iddi hi a'i theulu ifanc."
