Mae Vaughan Gething wedi dweud bod negeseuon Whatsapp coll o'i ddyddiau yn Weinidog Iechyd yn rhywbeth sy’n “codi cywilydd” arno.

Gething oedd Gweinidog Iechyd Cymru ar ddechrau pandemig Covid-19 ac mae’n ymgeisydd yn etholiad arweinyddol Llafur Cymru.

Wrth iddo roi tystiolaeth i'r ymchwiliad Covid-19 ddydd Llun gofynodd y prif gwnsler Tom Coole CB wrtho pam bod cymaint o’i negseuon Whatsapp wedi eu colli.

Dywedodd Vaughan Gething ei fod wedi cydweithio gyda thîm technegol gwybodaeth Llywodraeth Cymru i geisio eu hadfer ond wedi methu,

“Mae’n fater sy’n codi cywilydd arna i, achos pe bawn i wedi gallu adfer y negeseuon rheini fydden ni ddim yn cael y sgwrs yma,” meddai.

Dywedodd bod y negseuon Whsatsapp wedi cymryd lle “y math o sgyrsiau wyt ti’n eu cael yn y coridor” ac nad y nod oedd “osgoi gwneud penderfyniadau o fewn y llywodraeth”.

Roedd yn cydnabod serch hynny y dylai fod wedi glynu at reolaeth Llywodraeth Cymru ar y pryd sef bod angen arbed unrhyw drafodaethau swyddogol oedd yn digwydd ar ffonau personol.

“Rwy’n credu fod angen i ni gynnal adolygiad o ran beth sydd angen ei gadw ar gofnod a beth sy’n llai pwysig,” meddai.

“Mae’r cofnodion sydd ar gael yn adlewyrchu y penderfyniadau a wnaed a’r rhesymau drostyn nhw.

“Rydw i yn sicr yn difaru nad ydi’r holl negeseuon rheini ar gael i chi fel eich bod chi’n gallu eu gweld nhw a bodloni eich hunain eu bod nhw’n cyd-fynd gyda’r wybodaeth sydd gyda chi o’ch blaenau chi.”