"Heno mae Alabama wedi achosi dynoliaeth i gymryd cam yn ôl. Rwy'n gadael gyda chariad, heddwch a goleuni."

Dyma eiriau olaf y dyn cyntaf i gael ei ddienyddio gan ddefnyddio nwy nitrogen yn yr UDA.

Bu farw Kenneth Eugene Smith am 20:25 nos Iau (amser lleol), ac yn ôl llygaid dystion fe gymerodd 22 munud iddo farw wedi dechrau'r broses ddienyddio.

Roedd Goruchaf Lys yr Unol Daleithiau wedi rhwystro ymdrechion cyfreithwyr Mr Smith i’w achub, wedi iddynt ddisgrifio’r gosb fel un greulon.

Roedd Uwch Gomisiynydd y Cenhedloedd Unedig dros Hawliau Dynol wedi galw am atal dienyddiad Mr Smith, gan ddweud bod y dull yn gyfystyr ag artaith neu driniaeth greulon neu ddiraddiol.

Roedd ei gyfreithwyr hefyd wedi dadlau bod y dull yn rhy newydd ac “heb ei brofi,” gyda’r peryg o achosi iddo chwydu a thagu. 

Ond dywedodd talaith Alabama cyn y dienyddio nos Iau fod disgwyl iddo golli ymwybyddiaeth o fewn eiliadau, a marw o fewn munudau. 

Dedfryd

Cafodd Kenneth Eugene Smith ei ddedfrydu yn 1989 wedi iddo lofruddio Elizabeth Sennet, oedd yn wraig i bregethwr. 

Cafodd Ms Sennet ei llofruddio gan Mr Smith a dyn arall, John Forrest Parker, ar ran gŵr y fenyw oedd yn 45 oed ar y pryd. Cafodd Mr Parker ei ddienyddio yn 2010.

Bu farw Ms Sennet ar 18 Mawrth 1988 ar ôl i’r dynion ymosod arni a’i thrywanu sawl gwaith, gan greu difrod yn y tŷ  fel ei bod yn ymddangos fel bod byrgleriaeth wedi digwydd. 

Y gred yw fod ei gŵr wedi cyflogi’r dynion i’w llofruddio er mwyn iddo allu casglu arian yswiriant ond fe laddodd ei hun wrth i ymchwiliadau’r heddlu ddatblygu. 

Dywedodd Mr Smith ei fod yn bresennol pan gafodd Ms Sennet ei llofruddio, ond nad oedd wedi ymosod arni.

Llun: Heddlu lleol