Mae 13 o bobl wedi cael eu harestio ar ôl i ddynion arfog fygwth staff mewn stiwdio deledu yn Ecuador, wrth i raglen gael ei darlledu’n fyw ar yr awyr. 

Cafodd gweithwyr rhaglen deledu TC yn ninas Guayaquil eu gorfodi i ddisgyn i’r llawr gan ddynion arfog oedd â gorchudd dros eu hwynebau, cyn i’r ffrwd byw ddod i ben. 

Dywedodd yr awdurdodau yn lleol bod gweithwyr rhaglen TC wedi eu hachub a’u rhyddhau gan blismyn. 

Inline Tweet: https://twitter.com/PoliciaEcuador/status/1744823490262221042?ref_src=twsrc%5Etfw%7Ctwcamp%5Etweetembed%7Ctwterm%5E1744823490262221042%7Ctwgr%5Eef3027302223830611c06bc353bf12cf9e97eb9d%7Ctwcon%5Es1_&ref_url=https%3A%2F%2Fwww.aljazeera.com%2Fnews%2F2024%2F

Dywedodd yr orsaf deledu fod dau weithiwr wedi’u hanafu. Cafodd dyn camera ei saethu yn ei goes ac mae gweithiwr arall wedi torri ei fraich.

Mewn fideo a gafodd ei rannu ar gyfrif cyfryngau cymdeithasol yr heddlu yn lleol, daeth rhybudd y byddai’r ymosodwyr yn cael eu “cosbi am weithredoedd terfysgol.”

Inline Tweet: https://twitter.com/CmdtPoliciaEc/status/1744853625841602707

‘Argyfwng’

Daw’r ymosodiad wedi i o leiaf 10 o bobl gael eu lladd yn Ecuador ers ddydd Llun, a hynny ar ôl i ystad o argyfwng gael ei gyhoeddi yno am 60 diwrnod. 

Fe gafodd yr argyfwng ei gyhoeddi ar ôl i arweinydd giang adnabyddus y Choneros ddiflannu o’i gell mewn carchar. Ond mae’n aneglur a yw diflaniad Adolfo Macías Villamar, yn gysylltiedig â'r ymosodiad yn y stiwdio deledu, medd yr awdurdodau. 

Roedd anhrefn pellach mewn o leiaf chwe charchar arall ddydd Llun, ac fe gafodd wyth o bobl eu lladd a thri eu hanafu mewn ymosodiadau sy’n gysylltiedig â giangiau yn Guayaquil ddydd Mawrth. 

Yn ninas Riobamba, mae bron i 40 o garcharorion wedi dianc. Ac mae o leiaf saith o swyddogion yr heddlu hefyd wedi eu herwgipio.