Mae llawfeddygon yn yr Unol Daleithiau wedi perfformio’r trawsblaniad llygaid cyntaf erioed ar ddyn. 

Fe gafodd Aaron James llawdriniaeth 21 awr ar ei wyneb gan lawfeddygon yn Efrog Newydd, a hynny ar ôl iddo oroesi damwain drydanol. 

Ond nid oes unrhyw sicrwydd y bydd ei olwg yn dychwelyd, meddai’r arbenigwyr. 

Mae trawsblaniadau'r cornbilen eisoes wedi’i cynnal yn llwyddiannus ers blynyddoedd, ond dyma fydd y llawdriniaeth gyntaf i drawsblannu’r llygaid cyfan.

Fe gollodd Mr James, sy’n weithiwr llinellau trydanol foltedd uchel o Arkansas, hanner o’i wyneb yn 2021 wedi iddo gyffwrdd a gwifren 7,200 folt yn ddamweiniol.

Fe gafodd Mr James, sydd hefyd yn gyn-filwr, drawsblaniad prin ar ei wyneb, yn ogystal â’r trawsblaniad llygaid, ar 27 Mai eleni. Roedd dros 140 o arbenigwyr meddygol yn rhan o’r broses.

Mae llawfeddygon NYU Langone Health bellach wedi cyhoeddi ddydd Iau fod y gŵr yn gwella yn dilyn ei lawdriniaeth, a bod y llygad chwith yn edrych yn iach. 

"Mae'r ffaith ein bod ni wedi llwyddo i gyflawni'r trawsblaniad llygad cyfan cyntaf ar wyneb yn llwyddiannus yn gamp aruthrol - roedd nifer wedi meddwl ei fod yn amhosib,” meddai Dr Eduardo Rodriguez, a wnaeth helpu i arwain y llawdriniaeth. 

Mae Aaron James wedi galw’r trawsblaniad yn “drawsnewidiol” ac mae'n “hynod o ddiolchgar” i’r rhoddwr am ei gymorth.