Mae'r heddlu wedi cadarnhau fod corff dyn wedi ei ddarganfod ger Pier Bangor ddydd Sul.

Fe gadarnhaodd Heddlu Gogledd Cymru fod corff dyn 22 oed wedi ei ddarganfod ychydig wedi 07:00 fore Sul.

Mae'r heddlu hefyd wedi cadarnhau fod teulu'r dyn yn derbyn cefnogaeth gan swyddogion a'u bod yn parhau i ymchwilio i union amgylchiadau'r farwolaeth.

Dywedodd y Ditectif Arolygydd Richard Griffith: "Yn anffodus, fe dderbynion ni adroddiad bod corff wedi'i ddarganfod fore ddoe, ac rydym nawr yn gweithio i ddeall mwy am symudiadau olaf y dyn.

"Apeliwn ar unrhyw un a allai fod wedi bod yn yr ardal neu sydd â lluniau camera cerbyd rhwng Ffordd Caergybi, Bangor a Phorthaethwy o 02:00 i 05:00 fore Sul i gysylltu gyda ni."