Cafodd ‘mughsot’ Donald Trump ei gyhoeddi wedi iddo gael ei arestio yn nhalaith Georgia yn yr Unol Daleithiau.

Ef yw'r cyn-Arlywydd cyntaf yn hanes y wlad i gael ei lun wedi ei dynnu fel rhan o achos troseddol.

Dyma’r pedwerydd tro i Mr Trump gael ei gyhuddo o droseddau eleni ond dyma’r tro cyntaf i’w lun gael ei gyhoeddi ar ôl iddo gael ei arestio.

Fe gyhoeddodd Donald Trump y llun ar safle X - Twitter yn flaenorol. Dyna’r tro cyntaf iddo wneud defnydd o’i gyfrif ar y safle ers cael ei wahardd yn dilyn terfysg 6 Ionawr 2021.

Ar ôl treulio 20 munud dan glo cafodd ei ryddhau wedi iddo dalu bond mechnïaeth o $200,000 (£160,000).

“Mae’r hyn sydd wedi digwydd yma yn groes i gyfiawnder,” meddai wrth ohebwyr.

"Wnes i ddim byd o'i le, ac mae pawb yn gwybod hynny."

https://t.co/MlIKklPSJT pic.twitter.com/Mcbf2xozsY

— Donald J. Trump (@realDonaldTrump) August 25, 2023

Mae'r cyn-Arlywydd wedi ei gyhuddo yn Georgia o 11 achos, gan gynnwys rhoi pwysau ar swyddogion y dalaith i wrthod pleidleisiau dilys.

Gellir cosbi'r cyhuddiad mwyaf difrifol, sy’n cynnwys racetirio am uchafswm o 20 mlynedd yn y carchar.

Mae wedi gwadu'r cyhuddiadau ym mhob achos.

Mae 18 o bobol eraill ar y rhestr o ddiffynyddion gan gynnwys cyn-gyfreithiwr Trump Rudy Giuliani, cyn-bennaeth staff y Tŷ Gwyn Mark Meadows, cyn-gyfreithiwr y Tŷ Gwyn John Eastman a chyn-swyddog yn yr adran gyfiawnder, Jeffrey Clark.

Mae’r ditiad (indictment) yn nodi fod y cyd-gynllwynwyr honedig “yn fwriadol wedi ymuno â chynllwyn i newid canlyniad yr etholiad yn anghyfreithlon o blaid Trump”.