Mae'r Tywysog William yn cynllunio ar gyfer diwrnod ei goroni nid ar gyfer arwisgiad yn Dywysog Cymru, yn ôl adroddiadau.

Dywedodd “ffynhonnell agos at y Tywysog William” wrth bapur newydd y Times ei fod wedi penderfynu peidio â chynnal arwisgiad yn Dywysog Cymru wedi’r cwbl.

Yn hytrach, roedd eisoes wedi dechrau meddwl am ei seremoni coroni ei hun mewn 15 neu 20 mlynedd, meddai’r ffynhonnell.

Fe wnaeth cyhoeddiad y Brenin Charles III y byddai y Tywysog William yn etifeddu teitl Tywysog Cymru hollti barn a chodi gwrychyn nifer yng Nghymru pan ddaeth yn frenin yn dilyn marwolaeth Elizabeth II y llynedd.

Ond mae ansicrwydd wedi bod ers hynny a fyddai'r Tywysog William yn cynnal arwisgiad fel y gwnaeth ei dad, wrth i’r Teulu Brenhinol ddweud nad oedden nhw’n “cynllunio” ar gyfer un.

Roedd adroddiadau ym mhapur newydd y Telegraph y llynedd y gallai arwisgiad llai o faint gael ei gynnal yng Nghaerdydd.

Ond dywedodd ffynhonnell sy’n agos at William wrth bapur newydd y Times ei fod bellach yn canolbwyntio ar fod yn “berthnasol” a bod hynny i'w weld yn y modd yr oedd o "wedi penderfynu peidio â chael arwisgiad".

Yn hytrach, roedd eisoes wedi dechrau trafod gyda’i gynghorwyr a’i ffrindiau agosaf sut i gynnal seremoni coroni oedd yn teimlo’n fodern.

Dywedodd gohebydd brenhinol y Times, Roya Nikkhah: “Mae’r rheini sy’n agos ato yn tynnu sylw at ei benderfyniad i beidio â chynnal arwisgiad yn Dywysog Cymru fel arwydd o sut y bydd William yn parhau i dorri â thraddodiad fel etifedd yr orsedd.”

Llun:  Stefan Rousseau / PA.