Mae swyddogion cynllunio wedi argymell gwrthod adeiladu tai gwyliau ar gyfer pobol sydd am ddod a’u ceffylau gyda nhw yng Ngheredigion. 

Mae perchennog y safle ger Llanddewi Brefi yn gobeithio codi adeiladau a fydd yn caniatáu i ymwelwyr ‘glampio’ ochr yn ochor â’u ceffylau.

Cafodd y cais ei wneud er mwyn codi’r adeiladau ar fferm ddefaid 550-acr Penlanwen, tua milltir o Landdewi Brefi.

“Dyma fyddai’r unig safle yng Ngheredigion, a’r trydydd yn unig yng Nghymru gyfan, a fyddai yn cynnig cyfle i ymwelwyr ddod â’u ceffylau ar wyliau,” meddai'r asiant Living Design Consultancy.

Ond mae swyddogion cynllunio Cyngor Ceredigion wedi argymhell gwrthod y cais ar sail y ffaith na fyddai'r adeiladau yn ddigon agos at adeiladau’r fferm.

“Yn ogystal, roedd y safle mewn lleoliad agored yn weledol gyda golygfeydd ar draws Dyffryn Teifi a thu hwnt,” meddai’r adroddiad.

Ychwanegodd y byddai'r adeiladau wedi eu lleoli mewn man “ymwthiol yn weledol”.

Bydd cynghorwyr yn penderfynu ar y cais yr wythnos nesaf.