Mae Heddlu Gogledd Cymru wedi darganfod dwy ffatri ganabis arall ym Mangor. 

Dywedodd y llu fod dau o bobol wedi eu harestio ar amheuaeth o gynhyrchu cyffuriau Dosbarth B ar ôl i dyfiant sylweddol gael ei ganfod mewn dau adeilad gwahanol. 

Mae ymholiadau yn parhau, a bydd yr heddlu yn parhau i gydweithio gyda chyngor y dref i "gael gwared â'r cynhyrchiant o'r gymuned."

Dywedodd Maer Bangor, Gwynant Roberts, fod y ffaith fod "Bangor wedi cael ei thargedu gan rai gangiau troseddol a difrifol ar gyfer cynhyrchiant canabis ar raddfa fawr yn bryderus ac mae'r pryderon hyd wedi eu codi". 

Ychwanegodd fod "landlordiaid a datblygwyr absennol" yn rhannol ar fai am "y cynnydd diweddar mewn gweithgaredd troseddol" am "beidio ymweld â'u heiddo yn gyson". 

"Mae Cyngor Dinas Bangor yn edrych ar ffyrdd y gall weithio yn agosach gyda'r Heddlu a chefnogi eu gweithgareddau er mwyn atal y math hyn o weithgaredd troseddol."

Daw hyn wedi i'r heddlu gyhoeddi eu bod wedi dod o hyd i ffatri ganabis “ar raddfa ddiwydiannol” ar Stryd Fawr Bangor ddiwedd Mawrth.

Cafodd ffatri ganabis bedwar llawr mewn adeilad gwag ei darganfod ddiwedd mis Ionawr, ac un arall ym mis Chwefror.