Y ffilm Everything Everywhere All At Once sydd wedi cipio'r nifer fwyaf o wobrau yn seremoni wobrwyo'r Oscars eleni.

Derbyniodd y ffilm 11 o enwebiadau, ac fe enillodd saith gwobr yn y seremoni yn Los Angeles nos Sul.

Cafodd hanes ei greu wrth i Michelle Yeoh ennill y wobr am yr actores orau mewn prif ran, sef y fenyw gyntaf o dras Asiaidd i wneud hynny.

Brendan Fraser gipiodd y wobr am yr actor gorau mewn prif ran, a hynny am ei waith yn The Whale.

Y gân Naatu Naatu o'r ffilm iaith Telugu, enillodd y wobr am y gân orau o'r ffilm RRR. Dyma'r cynhyrchiad Indiaidd cyntaf i ennill y wobr.

Fe wnaeth y ffilm ryfel All Quiet on the Western Front gipio pedair gwobr ar y noson hefyd.

Mae rhagor o fanylion am yr holl enillwyr ar gael yma.