Mae Gary Lineker wedi dweud ei fod yn parhau gyda'i feirniadaeth o bolisi lloches y llywodraeth, ac nad yw'n ofni cael ei wahardd gan y BBC o ganlyniad i'w sylwadau.

Daw hyn wrth i Weinidog Diwylliant Llywodraeth y DU ddisgrifio ei sylwadau fel rhai "siomedig ac anaddas" a'i fod yn bwysig i'r BBC gynnal didueddrwydd er mwyn "cadw ymddiriedaeth y cyhoedd."

Mae Lineker, sydd yn cyflwyno rhaglen Match Of The Day y BBC, wedi wynebu beirniadaeth gan aelodau'r Blaid Geidwadol am gymharu polisi lloches y llywodraeth gyda'r iaith oedd yn cael ei ddefnyddio yn yr Almaen yn y 1930au.

Brynhawn dydd Iau fe ddywedodd ei fod yn falch fod y stori amdano'n tawelu a'i fod yn edrych ymlaen i gyflwyno Match Of The Day nos Sadwrn. 

Well, it’s been an interesting couple of days. Happy that this ridiculously out of proportion story seems to be abating and very much looking forward to presenting @BBCMOTD on Saturday. Thanks again for all your incredible support. It’s been overwhelming.

— Gary Lineker 💙💛 (@GaryLineker) March 9, 2023

Dywedodd yn ei neges gwreiddiol ar Twitter yn gynharach yn yr wythnos, gan gyfeirio ar fudwyr yn teithio i'r DU: "Does dim llif enfawr. Rydyn ni’n cynnig lloches i lawer iawn llai o ffoaduriaid na gwledydd eraill yn Ewrop. 

“Mae hwn yn bolisi creulon tu hwnt sydd wedi ei gyfeirio at y bobl fwyaf bregus gydag iaith sydd ddim yn annhebyg i hynny a ddefnyddiwyd yn yr Almaen yn y 30au.”

Cafodd ei gwestiynu gan newyddiadurwyr tu allan i'w dŷ fore Iau, a dywedodd nad yw'n difaru gwneud y sylwadau.

Dywedodd y BBC eu bod yn cymryd y mater "yn ddifrifol" ac yn disgwyl cael "sgwrs gall" gyda Lineker.

Fe wnaeth llefarydd ar ran Lineker wrthod gwneud unrhyw sylw pellach.

Llun: PA