![Moss](https://ncms.s4c.org.uk/sites/default/files/styles/newyddion_large_square_1000x1000_/public/2023-02/Screenshot%202023-02-19%20at%2008.51.45.png?itok=Hs6kA_OT)
Paganiaid 'ar gynnydd' am eu bod nhw'n agored i gymunedau LHDTC+
![ITV Cymru](https://ncms.s4c.org.uk/sites/default/files/2021-03/ITV_Cyrmu-Wales.png)
Paganiaid 'ar gynnydd' am eu bod nhw'n agored i gymunedau LHDTC+
Mae grŵp o Baganiaid wedi dweud mai derbyniad o’r gymuned LHDTC+ yw’r rheswm tu ôl i’r cynnydd yn nifer y bobl sy’n perthyn i'r grefydd.
Yn ôl y cyfrifiad diwethaf, mae yna 74,000 o Baganiaid yng Nghymru a Lloegr - 17,000 yn fwy ers 2011.
Mae Paganiaeth yn grefydd hynafol gyda ffocws ar draddodiadau Celtaidd, ysbrydolrwydd, a’r byd naturiol. Mae’n un o nifer o grefyddau sydd wedi gweld cynnydd mewn aelodaeth, gan gynnwys Wicca a Shamaniaeth.
Yn yr un cyfrifiad, cafodd ei datgelu nad oedd Cristnogaeth bellach yn grefydd fwyafrifol yng Nghymru a Lloegr, gyda 46% o bobl yn unig yn dweud eu bod nhw’n Gristnogol.
Mewn rhaglen ddogfen i ITV Cymru, fe wnaeth y gyflwynwraig Siân Adler ymchwilio i’r rhesymau dros y cynnydd mewn Paganiaid.
Dywedodd Moss, pagan o Ynys Môn: “Mae'r byd yn dod yn fwy ‘cwiar’, gan fod mwy o bobl yn hapus i fod pwy ydyn nhw.”
![Moss](https://ncms.s4c.org.uk/sites/default/files/styles/newyddion_large_square_1000x1000_/public/2023-02/Screenshot%202023-02-19%20at%2008.51.45.png?itok=Hs6kA_OT)
Yn ôl Moss, nid yw wedi wynebu rhagfarn yn seiliedig ar ei rywioldeb ers ymuno, a dywedodd dyna “ran fach o’r rheswm pam ry’n ni wedi gweld Paganiaeth yn tyfu”.
Yn y ddogfen, eglurodd Moss ei fod wedi troi at Baganiaeth ar ôl gadael y sefydliad Tystion Jehofa.
“O’m profiad i, os wyt ti’n cael dy eni’n hoyw, nid oes lle i ti fan’na, ond os wyt ti’n gadael, rwyt ti’n colli popeth,” meddai.
Fe wnaeth Moss sylweddoli ei fod yn hoyw yn 12 oed - profiad wnaeth “frifo’i enaid”.
'Cariad'
Pan ddechreuodd Moss ddatgelu ei rywioldeb yn 19 oed, dywedodd nad oedd aelodau o’i grefydd, Tystion Jehofa, yn gefnogol.
“Y tro cyntaf i mi ddweud wrth fy nheulu, fe wnaethon nhw i gyd grïo,” meddai.
O ganlyniad, dechreuodd iechyd meddwl Moss waethygu.
Dywedodd: “Roeddwn i mor isel, roeddwn i’n gofyn y cwestiwn…ydy o werth trïo aros efo’r grefydd a lladd fy hun ond marw’n ffyddlon, neu adael a byw?”
Fe wnaeth e egluro fod rhai aelodau o’i deulu “wedi’i ymddieithrio” am tua blwyddyn, ond eisoes wedi ail-gysylltu ers iddo adael y grefydd a dod yn Pagan.
Dywedodd Moss fod ei fywyd “wedi newid yn llwyr…mae gen i gariad, a dwi’n gallu bod pwy ydw i”.
'Goddefgarwch'
Mewn datganiad ymatebol, dywedodd sefydliad y Tystion Jehofa:
“Rydym yn cydnabod fod gan bob person yr hawl i ddewis sut i fyw. Ry’n ni’n dilyn cyngor y Beibl i drin pawb â pharch ac urddas, gan gynnwys y rhai all fod yn wahanol i ni ein hunain.
“Yn unol â’r geiriau, ‘pob peth yr ydych am i ddynion ei wneud i chwi, rhaid i chwithau hefyd ei wneud iddynt’ (Matthew 7:12), estynnwn at eraill yr un goddefgarwch yr ydym yn gwerthfawrogi ei dderbyn ganddynt.”
Gwyliwch y ddogfen gyfan, Siân â’r Paganiaid, ar YouTube Hansh, S4C a BBC iPlayer.