Mae'r rhybudd melyn am eira a rhew yn parhau ar gyfer y rhan helaeth o Gymru ddydd Mercher, wrth i rai ysgolion orfod cau.

Mae rhai ysgolion wedi gorfod cau yn ardaloedd Blaenau Gwent, Caerffili, Conwy, Sir Ddinbych, Sir y Fflint, Merthyr Tudful, Powys, a Rhondda Cynon Taf.

Dywedodd Heddlu De Cymru bod adroddiadau am geir yn mynd sownd yn yr eira yn ardal Merthyr Tudful, a mae Heddlu Dyfed Powys wedi rhybuddio am hewlydd llithrig.

Mae'r rhybudd melyn wedi bod mewn grym ers 12:00 ddydd Mawrth a bydd yn parhau mewn rhai ardaloedd tan 12:00 ddydd Iau.

Mae disgwyl y bydd y ffyrdd a rheilffyrdd yn cael eu heffeithio.

Fe allai rhwng 5-10cm o eira ddisgyn ar diroedd uchel, a hyd at 15cm ar diroedd uwch. 

Mae rhybudd hefyd y gallai'r rhew achosi anafiadau wrth i bobl lithro neu syrthio.

Dyma'r siroedd sydd yn cael eu heffeithio gan y rhybudd heddiw:

• Abertawe
• Blaenau Gwent
• Caerfilli
• Castell-nedd Port Talbot
• Ceredigion
• Conwy
• Gwynedd
• Merthyr Tudful
• Powys
• Rhondda Cynon Taf
• Sir Ddinbych
• Sir Fynwy
• Sir Gâr
• Sir y Fflint
• Torfaen
• Wrecsam
• Ynys Môn 

Llun: Heddlu Gogledd Cymru