Bydd gweithwyr ambiwlans sy'n aelodau o undeb GMB yn mynd ar streic yng Nghymru ddydd Mercher mewn anghydfod dros gyflog a staffio.

Dyma'r ail waith i aelodau'r undeb streicio mewn tair wythnos. 

Ni fydd unrhyw un o'r gweithwyr yn streicio am fwy na 12 awr, ond mae arweinwyr iechyd wedi rhybuddio y bydd pwysau ychwanegol ar y gwasanaeth iechyd yn sgil y streic. 

Mae disgwyl i gleifion orfod disgwyl yn hirach am alwadau 999 ac 111, gyda llai o ambiwlansys ar y ffyrdd. 

As of 00:01, our service will be subject to industrial action.

Please help us protect the resources we have available for those whose lives are in danger.

If you call 999 and it’s not an emergency you may not receive an ambulance response or may wait many hours. pic.twitter.com/0jw961MqgP

— Welsh Ambulance (@WelshAmbulance) January 10, 2023

Er hyn, mae disgwyl i weithwyr y gwasanaeth iechyd yng Nghymru dderbyn cynnig taliad untro gan y llywodraeth er mwyn ceisio dod â'r streiciau i ben.

Yn ôl undebau, mae'r cynnig presennol o 4% o godiad cyflog yn cynrychioli "toriad cyflog mewn gwirionedd" gan nad yw'n unol â chyfradd chwyddiant. 

Mae undeb y GMB yn dweud fod y gwasanaeth iechyd "ar ei gliniau, ac ni all pethau barhau fel hyn. Mae'r cyhoedd yn dioddef yn ddyddiol oherwydd bod y llywodraeth wedi methu â chynllunio ar gyfer ein gwasanaeth iechyd."

Dywedodd llefarydd ar ran Llywodraeth Cymru eu bod yn "cydnabod pam bod cymaint o weithwyr ambiwlans wedi pleidleisio yn y ffordd y gwnaethant yn ogystal â'r dicter a'r siom mae cymaint o weithwyr yn y sector gyhoeddus yn ei deimlo ar hyn o bryd. 

"Ond mae'n hanfodol ein bod ni gyd yn gwneud popeth yn ein gallu i leihau'r pwysau ar y gwasanaeth iechyd yn ystod y gweithredu diwydiannol ac ystyried yn ofalus pa weithgaredd i'w gwneud."