Roedd yr economi wedi lleihau 0.2% yn y tri mis hyd at fis Medi, yn ôl y ffigyrau diweddaraf.

Mae'r amcangyfrif misol ar gyfer mis Medi yn dangos fod Cynnyrch Mewnwladol Crynswth (GDP) wedi disgyn 0.6%, ond cafodd yr ŵyl y banc ar gyfer Angladd Gwladol y Frenhines effaith ar hynny.

Fe wnaeth y diwydiannau gwasanaethau, cynhyrchu ac adeiladu arafu yn ystod y cyfnod.

Disgynnodd gwariant go iawn aelwydydd 0.5% yn Chwarter 3 2022.

Mae'r Canghellor Jeremy Hunt wedi dweud nad yw'r Deyrnas Unedig yn "ddiogel" rhag lefelau chwyddiant uchel.

"Dydyn ni ddim yn ddiogel rhag yr her fyd-eang o chwyddiant uchel a thwf araf sydd wedi ei yrru gan ryfel anghyfreithlon Putin yn Wcráin a'i ddefnydd o gyflenwadau nwy fel arf," meddai.

"Dwi ddim yn twyllo fy hun nad oes ffordd anodd o'n blaen - un fydd yn galw am benderfyniadau hynod o anodd i adfer hyder a sefydlogrwydd economaidd.  Ond i wireddu twf hirdymor, cynaliadwy, mae angen i ni afael mewn chwyddiant, cyd-bwyso'r llyfrau a chael dyled i ddisgyn.  Nid oes ffordd arall.

"Tra bo economi'r byd yn wynebu cythrwfl eithafol, mae gwytnwch sylfaenol economi Prydain yn achos optimistiaeth yn yr hir dymor."