Mae enwau carfan tîm pêl-droed Cymru ar gyfer Cwpan y Byd yn Qatar wedi eu cyhoeddi. 

Dyma'r tro cyntaf ers 1958 i Gymru chwarae yn rowndiau terfynol Cwpan y Byd ac fe gafodd y garfan ei chyhoeddi ym Mhendyrus yn y Rhondda, sef pentref genedigol rheolwr Cymru, Robert Page, nos Fercher.

Cyfanswm o 26 chwaraewr oedd yn cael eu dewis, ac yn ffodus i gefnogwyr Cymru, mae'r enwau cyfarwydd i gyd yn y garfan. 

O Gareth Bale i Aaron Ramsey, ac o Ben Davies i Wayne Hennessey, mae gan Rob Page brofiad chwaraewyr sydd wedi chwarae yn rhai o bencampwriaethau mwyaf y byd mewn hanes diweddar. 

Mae Joe Allen hefyd wedi ei gynnwys yn y garfan er nad ydy wedi chwarae i Abertawe ers canol mis Medi oherwydd anaf i'w goes.  

Er eu bod bellach yn chwarae yn Adran Dau, mae'r chwaraewyr profiadol Jonny Williams a Chris Gunter hefyd yn rhan o'r garfan.

Image

Rhai o'r chwaraewyr sydd heb eu cynnwys yn y garfan ydy Tyler Roberts, sydd wedi anafu, Rabbi Matondo, ac mae enw ymosodwr ifanc yr Elyrch, Oli Cooper, yn absennol hefyd.  

Enw ychydig yn annisgwyl efallai i rai cefnogwyr ydy amddiffynwr Luton, Tom Lockyer, sydd ddim wedi bod yn aelod rheolaidd o'r garfan dros y misoedd diwethaf.

Bydd gêm agoriadol Cymru yng Nghwpan y Byd Qatar yn erbyn yr UDA ar 21 Tachwedd. 

Image

Carfan tîm pêl-droed Cymru:

1) Wayne Hennessey

2) Danny Ward

3) Adam Davies

4) Ben Davies

5) Ben Cabango

6) Tom Lockyer

7) Joe Rodon

8) Chris Mepham

9) Ethan Ampadu

10) Chris Gunter

11) Neco Williams

12) Connor Roberts

13) Sorba Thomas

14) Joe Allen

15) Matthew Smith

16) Dylan Levitt

17) Harry Wilson

18) Joe Morrell

19) Jonny Williams

20) Aaron Ramsey

21) Rubin Colwill

22) Gareth Bale

23) Kieffer Moore

24) Mark Harris

25) Brennan Johnson

26) Dan James