Newyddion S4C

Lula da Silva / Wikimedia Commons

Lula da Silva yn ennill etholiad arlywyddol Brasil

NS4C 31/10/2022

Mae Lula da Silva wedi ennill etholiad arlywyddol Brasil, wedi brwydr agos yn erbyn yr arlywydd presennol, Jair Bolsonaro.

Enillodd Mr da Silva, o'r asgell chwith, 50.8% o'r pleidleisiau tra gwnaeth Mr Bolsonaro, o'r asgell dde, hawlio 49.2%,

Roedd Mr da Silva yn arlywydd y wlad rhwng 2003 a 2010 ac mae ei fuddugoliaeth yn nodi'r tro cyntaf ers 1985 i'r arlywydd presennol fethu â chael ei ail-ethol. 

Mae Mr da Silva yn dychwelyd fel arlywydd wedi iddo gael ei garcharu yn 2018. Fe olygodd hynny nad oedd modd iddo sefyll yn yr etholiad y flwyddyn honno, gan alluogi Mr Bolsonaro i sicrhau pedair blynedd o wleidyddiaeth asgell dde. 

Brasil yw’r bedwaredd wlad ddemocrataidd fwyaf yn y byd ac mae dros 156 miliwn o bobl yn gymwys i bleidleisio.

Fe fydd yr enillydd yn dechrau fel arlywydd ym mis Ionawr.

This website uses cookies to ensure you get the best experience on our website.