Mae Wrecsam wedi cyrraedd y rhestr hir ar gyfer Dinas Diwylliant y DU 2029. 

Mae naw dinas ar draws y DU wedi cyrraedd y rhestr hir, a Wrecsam yw'r unig ddinas yng Nghymru. 

Pe bai Wrecsam yn cipio teitl Dinas Diwylliant y DU 2029, fe fyddai'n gallu sicrhau £10 miliwn gan Lywodraeth y DU.

Dywedodd Ymgyrch Wrecsam 2029 y byddai'r buddsoddiad yn gallu helpu i ddenu buddsoddiad, hybu twristiaeth a gwella mynediad at y celfyddydau a diwylliant yn yr ardal ac ar draws y rhanbarth.

Fe allai hefyd helpu cerddoriaeth a chwaraeon ar lawr gwlad a chefnogi pobl sy'n gweithio ac yn byw yn yr ardal, yn ôl yr ymgyrch. 

Methodd Wrecsam â chipio'r teitl yng nghystadleuaeth 2025. 

Yn ôl yr ymgyrch, fe allai'r buddsoddiad gynhyrchu mwy na £200 miliwn ar gyfer yr holl ranbarth yn y blynyddoedd i ddod. 

Nid oes yr un ddinas yng Nghymru wedi ennill teitl Dinas Diwylliant y DU eto. 

Dywedodd Amanda Evans, Cyfarwyddwr Cais Diwylliant Ymddiriedolaeth Gymunedol a Diwylliannol Wrecsam: "Rydym wrth ein bodd ein bod wedi cyrraedd y rhestr hir ac yn fwy brwdfrydig nag erioed i ennill teitl Dinas Diwylliant y DU ar gyfer 2029.

"Bydd ennill y cynnig yn helpu i sicrhau dyfodol cymdeithasol ac economaidd disglair i Wrecsam, gan ddod â chyfleoedd newydd i bobl sy'n byw ac yn gweithio yn yr ardal, yn ogystal â chefnogi ein sector celfyddydau a diwylliant mewn mwy o ffyrdd nag erioed o'r blaen. 

"Mae hwn yn gyfnod cyffrous iawn, iawn i ni ac rydym yn ymrwymo popeth dros yr ychydig fisoedd nesaf i roi Wrecsam ar lwyfan byd-eang a dangos pam ein bod yn deilwng o ennill y teitl."

Fe fydd Wrecsam bellach yn cael ei gwahodd i gyflwyno cais llawn i Adran Diwylliant, y Cyfryngau a Chwaraeon Llywodraeth y DU erbyn haf 2026.

Fe fydd rhestr fer o hyd at bedwar lle yn cael ei chyhoeddi ym mis Hydref eleni. 

Rhestr hir Dinas Diwylliant y DU 2029:

1. Wrecsam
2. Inverness
3. Ipswich
4. Middlesbrough
5. Milton Keynes
6. Portsmouth
7. Sheffield
8. Swindon
9. Blackpool