Mae Ysbyty Tywysoges Cymru ym Mhen-y-bont ar Ogwr wedi dweud nad ydyn nhw yn derbyn cleifion i’r uned achosion brys sydd ar y safle ddydd Mawrth ar ôl problem gyda chyflenwad dŵr yno

Dywedodd y bwrdd iechyd bod y cyflenwad dŵr “wedi ei atal dros dro”, ond eu bod nhw’n ceisio datrys y broblem.

Maen nhw’n cynghori pobl i fynd i ysbyty arall os ydyn nhw angen sylw meddygol brys.

Mewn datganiad a gafodd ei gyhoeddi ar wefan Bwrdd Iechyd Prifysgol Cwm Taf Morgannwg, fe ddywedon nhw: "Rydym yn profi aflonyddwch sylweddol dros dro i'r cyflenwad dŵr yn Ysbyty Tywysoges Cymru.

"Oherwydd prinder dŵr, ar hyn o bryd dydyn ni ddim yn gallu derbyn cleifion i'r Adran Argyfwng heno tra ein bod ni’n gweithio i ddatrys y broblem.

"Peidiwch â dod i’r Adran Argyfwng yn Ysbyty Tywysoges Cymru oni bai ei fod yn gwbl angenrheidiol. 

"Os oes angen gofal brys neu argyfwng arnoch, ewch i ysbyty arall lle bynnag y bo modd."

Ni fydd yr ysbyty yn derbyn ymwelwyr nos Fawrth chwaith.

Ychwanegodd y bwrdd iechyd: "Rydym yn gweithio'n agos gyda Dŵr Cymru i adfer gwasanaethau cyn gynted â phosibl.

"Byddwn yn rhoi'r wybodaeth ddiweddaraf i chi cyn gynted ag y bydd rhagor o wybodaeth ar gael.

"Diolch am eich amynedd a'ch dealltwriaeth."

Cyhoeddodd Dŵr Cymru nos Fawrth nad yw'r problemau gyda'r cyflenwad yn gysylltiedig a'u darpariaeth nhw, ond bod eu peirianwyr yn dal i fod ar y safle yn cynorthwyo'r ysbyty.  

Mae’r adran ddamweiniau ac achosion brys agosaf at Ysbyty Tywysoges Cymru tua hanner awr oddi yno, yn Ysbyty Brenhinol Morgannwg yn Llantrisant.