Mae'r actor Tom Rhys Harries wedi dweud y byddai wrth ei fodd yn gweld chwedlau'r Mabinogi'n cael eu haddasu ar gyfer y sgrîn fawr.

Wrth siarad â Newyddion S4C cyn rhyddhau ei ffilm newydd, Clayface, bu’r actor o Gaerdydd yn trafod addasiad o chwedlau hynafol Cymru, ei falchder am lwyddiant ysgubol Effi o Blaenau, a’r cyfle i weithio gyda chyd-Gymry yn Hollywood.

Yn Clayface, mae Tom yn actio'r cymeriad Matt Hagen, actor llwyddiannus o Gotham sy’n dioddef anafiadau difrifol i’w wyneb mewn ymosodiad sy’n chwalu ei yrfa.

Mae’n troi at y gwyddonydd Caitlyn Corr am driniaeth arbrofol i adfer ei wyneb. 

Ond mae’r driniaeth yn arwain at newidiadau brawychus i’w gorff ac yn effeithio ar ei afael ar realiti.

Image

Yn ystod ei gyfweliad, cafodd y gymhariaeth ei gwneud rhwng y berthynas gymhleth hon a stori Blodeuwedd yn y Mabinogi, sy’n cynnwys elfennau o gariad, brad a newid corff.

“Fi wastad ’di meddwl bydde ti yn gallu neud y Mabinogi gyda cyllideb digon fawr, bydde hwnna yn rili cŵl,” meddai.

Aeth ymlaen i ystyried y syniad o ddod â Blodeuwedd a chymeriad Poison Ivy o fyd DC at ei gilydd.

“Os mae Blodeuwedd mewn byd arswyd, gyda sbin modern arna fe, ie falle - Blodeuwedd a Poison Ivy."

Ychwanegodd fod cael dychwelyd i Gymru i weithio ar brosiectau y gellid eu cyflwyno “ar y llwyfan mwyaf eang a posib” yn golygu llawer iddo.

“A fydd o sicr yn meddwl lot i mam!” meddai.

Effi o Blaenau

Nid chwedlau Cymru yn unig sy’n ei gyffroi. Bu Tom hefyd yn sôn am ei falchder am lwyddiant Effi o Blaenau, lle mae’n serennu ochr yn ochr â Leisa Gwenllian.

“Un o’r pethau fi’n mwyaf browd o blwyddyn yma yw llwyddiant Effi o Blaenau, mae Leisa Gwenllian yn arwain y ffilm yn wych, mae’n rili gyffrous i weld beth mae Leisa’n neud nesaf.”

Roedd y ffilm hefyd yn gyfle iddo weithio unwaith eto gyda’r cyfarwyddwr Marc Evans, a gyfarwyddodd ei ffilm gyntaf, Hunky Dory.

“I allu mynd nôl i weithio ’da Marc a wneud y ffilm cyntaf fi ’di neud trwy gyfrwng y Cymraeg, fi jyst yn teimlo yn rili ddiolchgar am yr holl prosiectau gwahanol fi ’di gallu gwneud blwyddyn yma. Hwnna yn enwedig.”

Cyd-Gymry yn Hollywood

Nid Tom yw’r unig wyneb o Gymru yn Clayface, gyda Rob Brydon hefyd yn ymddangos ynddi.

“Roedd Rob yn y ffilm achos, wel, yn rhannol achos bod fi yn dod o Gymru,” meddai.

Daeth y syniad o gynnwys Rob Brydon yn y ffilm mewn sgwrs rhwng Tom a’r cyfarwyddwr James Watkins, ar ôl gorffen y prif gyfnod o ffilmio.

“Fi’n meddwl bod e mor wych yn y ffilm, a bod e yn byw o fewn y byd yna lle mae ’da fe gefndir o fewn comedi ond mae fe’n actor dramtig rili gryf.”

Image

Yn ystod y sgwrs, bu Tom hefyd yn trafod ei gysylltiadau â’r actor Matthew Rhys.

“Fi wedi bod ar bach o crusade i drio cael Matthew i gwrdd â fi.”

Wrth restru’r cysylltiadau rhyngddyn nhw, dywedodd fod y ddau’n dod o Gaerdydd: “Aeth o i Lantaf, ag es i i Blasmawr.”

Mae tadau’r ddau hefyd wedi gweithio fel penaethiaid ysgolion.

“Mae’r venn diagram Matthew Rhys a fi yn eithaf populated.”

Mae Tom a’i gariad yn byw yn Los Angeles, lle mae’r actores Jennifer Gre - sy’n enwog am chwarae 'r cymeriad Baby yn Dirty Dancing - yn gymydog iddyn nhw.

“Fi’n siarad gyda Jennifer Grey bron pob dydd,” meddai.

Mae cysylltiad arall â Matthew drwy Jennifer hefyd, gan mai hi oedd yn gyfrifol am ddod â Matthew a’i bartner, yr actores Keri Russell, at ei gilydd.

O Gaerdydd i Gotham

Dechreuodd gyrfa Tom yng Nghymru, gan astudio yng Ngholeg Brenhinol Cerdd a Drama Cymru a gwneud ei ymddangosiad ffilm cyntaf yn Hunky Dory yn 2011.

Wrth iddo gamu i brif rôl ym myd DC, mae rhannu’r profiad gyda phobl sy’n agos ato yn bwysig iddo.

Mewn cyfweliad â Newyddion S4C ym mis Awst 2025, dywedodd Tom ei fod am weld mwy yn cael ei wneud i hybu talentau creadigol pobl o Gymru.

Bu’n trafod y cydweithio rhwng Canton Studios a DC ar gyfer Clayface, a chael ei ffrind agos, y ffotograffydd Carys Huws, yn rhan o’i dîm.

Mae wedi adnabod Carys ers pan oeddynt yn blant, ac mae ei gefnder Harri yn rhedeg Canton Studios.

“Ni’n trio creu rhywfath o ‘Taffia’ ffilm a deledu,” medddai gan chwerthin.

Image

Esboniodd fod y syniad ar gyfer y cydweithio wedi dechrau mewn sgwrs gyda Harri bedwar neu bum mis ynghynt.

I Tom, mae cael rhannu’r profiadau hyn gyda phobl sy’n agos ato yn rhan bwysig o’r llwyddiant y mae'n ei fwynhau ar hyn o bryd.

“Os wyt ti’n gallu mynd a’r siwrne efo pobl ti’n caru ag yn credu mewn, dyna’r pwynt rili yn dyw e?”

Bydd Clayface mewn sinemâu ym Mhrydain o ddydd Gwener.