Roedd dyn a fu farw ar ôl i arwydd gwympo mewn gŵyl Gristnogol yn weinidog uchel ei barch, yn "ŵr cariadus" ac yn "dad ymroddedig a gofalgar", yn ôl ei eglwys yn ne-ddwyrain Lloegr.

Cafodd Robert Guanco, 41 oed, o Eastbourne, ei enwi mewn teyrnged gan Eglwys Jesus Living Water Eastbourne.

Erbyn hyn, mae tudalen GoFundMe wedi'i sefydlu i helpu ei deulu yn dilyn ei farwolaeth.

Cafodd chwech o bobl eraill eu hanafu yn dilyn y digwyddiad yng ngŵyl Big Church Festival ger Steyning, West Sussex, brynhawn Gwener.

Cafodd Mr Guanco ei ddisgrifio fel "ein gweinidog annwyl Robert" mewn teyrnged gan ei eglwys ddydd Sul.

"Gyda chalon drwm iawn, rydym yn rhannu'r newyddion trist bod ein gweinidog annwyl Robert wedi marw ddoe, 28 Awst 2026," meddai'r deyrnged.

"Rydym yn galaru ac yn gweddïo, gan ymddiried yn yr Arglwydd yn ystod y cyfnod hynod anodd hwn.

"Mae llawer o bethau na fyddwn efallai byth yn eu deall yn llawn, ac efallai y bydd ein calonnau'n cael trafferth deall yr hyn sydd wedi digwydd.

"Eto i gyd, hyd yn oed yn ein galar dyfnaf, rydym yn parhau i ymddiried yn sofraniaeth Duw."

Ychwanegodd y deyrnged: "Roedd y Gweinidog Robert yn was ffyddlon i Dduw, yn ŵr cariadus i Isay, yn dad ymroddedig a gofalgar i Ellie, ac yn fendith i gynifer o bobl y cyffyrddodd â'u bywydau.

"Ni fydd ei fywyd, ei ffydd, ei gariad a'i wasanaeth i Dduw byth yn cael eu hanghofio."

Llun: GoFundMe