Mae asgellwr Cymru Sorba Thomas "heb ei anafu" ar ôl damwain car fore Gwener.

Dywedodd ei glwb, Hull City, nad oedd wedi dioddef unrhyw anafiadau ar ôl i lun o'r car gael ei rannu ar-lein.

Mae'r car wedi troi ben i waered, gyda'r ffenestri wedi eu torri.

Mewn datganiad dywedodd Hull City: "Rydym yn falch o gadarnhau nad yw Sorba Thomas wedi cael ei anafu yn dilyn damwain car ger safle hyfforddi'r clwb yn Cottingham.

"Mae'r clwb yn ymwybodol o ddelweddau o gar Sorba sy'n cael eu rhannu ar y cyfryngau cymdeithasol, a gallwn sicrhau cefnogwyr nad yw wedi cael unrhyw anafiadau."

Inline Tweet: https://twitter.com/harryshakey03/status/2098329121407295926?s=20

Fe wnaeth Thomas arwyddo i Hull City o Stoke City ar ddiwrnod olaf y ffenestr drosglwyddo ar ddechrau'r mis.

Mae disgwyl iddo gael ei gynnwys yng ngharfan Cymru ar gyfer gemau agoriadol Cynghrair y Cenhedloedd UEFA yn erbyn Portiwgal a Denmarc yn ddiweddarach ym mis Medi.