Mae prif hyfforddwr Cymru, Steve Tandy, yn dweud bod yr anghydfod rhwng ei garfan ac Undeb Rygbi Cymru (URC) "heb effeithio" ar y paratoadau cyn herio Ffiji ddydd Sadwrn.

Roedd anghytundeb rhwng y chwaraewyr ac URC am "delerau cyflogaeth", cyn iddynt ddod i gytundeb yn hwyr brynhawn dydd Mercher.

Roedd sefyllfa debyg yn 2023 pan oedd y chwaraewyr yn bygwth streicio cyn wynebu Lloegr yn y Chwe Gwlad.

Er gwaethaf yr anghydfod yr wythnos hon, mae Steve Tandy yn mynnu nad yw'r paratoadau ar y cae wedi cael eu heffeithio.

"A bod yn deg, mae'r chwaraewyr wedi bod yn wych," meddai.

"Dwi'n ddiolchgar bod y sefyllfa wedi'i datrys a bod pethau wedi symud ymlaen.

"Dyw'r paratoadau heb gael eu heffeithio o ran y sesiynau hyfforddi ar y cae, rydym yn gallu canolbwyntio ar wynebu Ffiji."

Image

Bydd Cymru yn wynebu Ffiji yn Stadiwm Dinas Caerdydd ddydd Sadwrn, ac mae’r gêm yn cael ei chyfrif fel gêm gartref i Ffiji am eu bod yn chwarae eu gemau yn y gystadleuaeth dramor eleni.

Mae adroddiadau'n awgrymu mai tua 16,000 o docynnau'n unig sydd wedi'i gwerthu ar gyfer y gêm yn y brifddinas.

Dyma gêm gyntaf cystadleuaeth newydd Pencampwriaeth y Cenhedloedd, lle bydd timau o hemisffer y gogledd yn herio timau o hemisffer y de dros gyfnodau’r haf a’r hydref.

Dros y blynyddoedd, mae Cymru a Ffiji wedi chwarae gemau cofiadwy, gan gynnwys yng Nghwpan y Byd 2023 yn Ffrainc.

Enillodd Cymru 32-26, ond doedd hi ddim yn gêm hawdd i'r crysau cochion o bell ffordd.

Roedd Cymru wedi cwblhau 248 tacl yn ystod yr 80 munud, y mwyaf erioed mewn gêm gystadleuol ryngwladol.

Fe allai pethau fod wedi bod mor wahanol pe bai Semi Radradra heb ollwng y bêl yn y munud olaf wrth y llinell gais.

Gêm gofiadwy arall yw buddugoliaeth Ffiji dros Gymru yng Nghwpan y Byd 2007.

Roedd angen buddugoliaeth ar y Ffijiaid i gyrraedd rownd yr wyth olaf, gan olygu y byddai Cymru allan o'r gystadleuaeth.

Enillodd y Ffijiaid 38-34 ac roedd y canlyniad yn un o'r mwyaf annisgwyl yn hanes Cwpan Rygbi'r Byd ar y pryd.

Ers hynny, mae Ffiji wedi ennill dwywaith yn erbyn Cymru, a nhw yw'r ffefrynnau i ennill ddydd Sadwrn.

Carfan Cymru

Ar ôl chwarae yn safle’r cefnwr drwy’r Chwe Gwlad, bydd Louis Rees-Zammit yn dychwelyd i’r asgell ar gyfer y gêm yn Stadiwm Dinas Caerdydd, gyda Blair Murray yn hawlio’r crys rhif 15.

Bydd y profiadol Adam Beard hefyd yn cychwyn y gêm yn dilyn anaf i’r clo Dafydd Jenkins.

Yn y rheng flaen, mae Rhys Carre wedi’i enwi yn safle’r prop pen rhydd, gan ymuno â'r prop Dillon Lewis a’r bachwr a chapten Dewi Lake, a chwaraeodd yn y fuddugoliaeth 33-31 yn erbyn y Barbariaid yn Allianz Twickenham ddydd Sadwrn diwethaf.

Inline Tweet: https://twitter.com/NewyddionS4C/status/2072596316350255347/photo/1

Mae Steve Tandy yn dweud ei fod yn gyffrous i chwarae yng Nghaerdydd yng ngêm agoriadol y gystadleuaeth.

“Rydyn ni’n caru bod yng Nghymru ar gyfer ein gemau," meddai.

"Mae’r gefnogaeth yn golygu llawer iawn i ni ac mae ein cefnogwyr yn anhygoel yn y ffordd y maen nhw’n dangos eu cefnogaeth i’r tîm. Rydyn ni’n gyffrous i fod yng Nghaerdydd i ddechrau Pencampwriaeth y Cenhedloedd.”

Bydd Cymru yn erbyn Ffiji yn fyw ar S4C, S4C Clic a BBC iPlayer am 13:30 ddydd Sadwrn.