Mae gyrrwr fan wedi marw yn dilyn gwrthdrawiad 'difrifol' gyda bws ar ffordd yr A40 yn Sir Gâr ddydd Gwener. 

Dywedodd Heddlu Dyfed-Powys eu bod yn ymchwilio i'r gwrthdrawiad ar yr A40 rhwng bws a fan, rhwng Llandeilo a Nantgaredig, am 16.25 brynhawn Gwener.

Bu farw gyrrwr y fan yn y fan a'r lle. Mae ei deulu wedi cael gwybod ac yn cael eu cefnogi gan swyddogion arbenigol. 

Roedd yna un teithiwr 14 oed ar y bws yn ogystal â'r gyrrwr, ac fe gafodd y ddau eu cludo i Ysbyty Glangwili gyda mân anafiadau.

Ychwanegodd yr heddlu fod y ffordd bellach wedi ail-agor.

Mae'r llu yn annog unrhyw un â gwybodaeth i gysylltu â nhw gan ddefnyddio'r cyfeirnod DP-20260703-277.