Mae rhybuddion am lifogydd wedi’u cyhoeddi ar draws Cymru ddydd Sadwrn wrth i Storm Boelo daro’r wlad.

Mae Cyfoeth Naturiol Cymru wedi cyhoeddi tri rhybudd am lifogydd yn y de, gyda 26 o rybuddion ‘paratowch am lifogydd’ ar draws Cymru hefyd.

Mae’r rhybuddion am lifogydd yn cynnwys Afon Tywi yn Llanwrda, Sir Gâr; Afon Elái yn Llanbedr-y-fro, Bro Morgannwg; ac Afon Elái yn Nhonysguboriau, Rhondda Cynon Taf.

Dywedodd Cyfoeth Naturiol Cymru fod perygl i lefelau dŵr afonydd godi yn uwch yn yr ardaloedd hyn, gyda’r glaw yn parhau tan 21:00 nos Sadwrn. 

Gallwch weld yr holl rybuddion fan hyn.

Daw’r rhybuddion ar ôl i’r Swyddfa Dywydd gyhoeddi rhybudd melyn ar gyfer Cymru gyfan ddydd Sadwrn.

Mae’r rhybudd melyn am law mewn grym rhwng 11:00 a 23:00.

Mae rhybudd melyn am wynt hefyd yn berthnasol i rannau o ogledd Cymru, gan gynnwys ardaloedd yng Nghonwy, Sir Ddinbych, Sir y Fflint, Gwynedd, Ynys Môn a Wrecsam.

Dywedodd y Swyddfa Dywydd ei bod yn debygol y bydd llifogydd ar y ffyrdd yn arwain at deithiau hirach ddydd Sadwrn.

Gallai’r tywydd hefyd darfu ar wasanaethau trenau a bysiau, gyda theithiau’n cymryd mwy o amser neu rai gwasanaethau’n cael eu canslo.

Mae Trafnidiaeth Cymru eisoes wedi canslo rhai gwasanaethau trên ddydd Sadwrn oherwydd y tywydd garw.

Mae Stena Line, sy’n gweithredu gwasanaeth fferi rhwng Caergybi a Dulyn, hefyd wedi canslo rhai teithiau brynhawn a nos Sadwrn.

Mae’n debygol y bydd toriadau i gyflenwadau trydan a gwasanaethau eraill hefyd, ac mae’n bosibl y bydd llifogydd yn effeithio ar rai cartrefi a busnesau.

Storm Austen oedd y gyntaf o’r tymor o dywydd garw i daro Cymru ddydd Gwener, gyda rhybudd melyn am wyntoedd cryfion mewn grym ar draws rhannau helaeth o Gymru a Lloegr.

Fe wnaeth y storm achosi toriadau trydan a effeithiodd ar filoedd o gartrefi yng Nghymru a Lloegr.