Mae'r Swyddfa Dywydd wedi cyhoeddi rhybudd melyn am fellt a tharanau i'r rhan fwyaf o Gymru fore Iau, wedi rhybudd i rannau o'r wlad ddydd Mercher.

Fe fydd y rhybudd ddydd Iau mewn grym rhwng 06:00 a 22:00 ddydd Iau, ac yn effeithio ar bob rhan o Gymru heblaw am Sir Benfro, Abertawe a Bro Morgannwg.

Daw wedi rhybudd melyn am fellt a tharanau ar gyfer dwyrain Cymru ddydd Mercher.

Mae’r rhybudd ddydd Mercher ar gyfer siroedd Conwy, Sir Ddinbych, Sir y Fflint, rhannau o Wynedd, Sir Fynwy, Powys a Wrecsam.

Daeth i rhybudd hwnnw i rym am 03:00 fore Mercher ac mae'n parhau tan 22:00 nos Fercher.

Yn ôl y Swyddfa Dywydd, mae'n debygol iawn y bydd y rhybudd ddydd Iau yn effeithio ar amodau gyrru, gyda dŵr ar y ffordd, dŵr yn tasgu neu genllysg, gan arwain at deithiau hirach mewn ceir a bysiau.

Mae oedi i wasanaethau trên hefyd yn bosib.

Mae’r rhybudd yn dweud y gallai mellt achosi rhywfaint o ddifrod i rai adeiladau a strwythurau, ac mae colli trydan neu wasanaethau eraill am gyfnod byr yn debygol mewn rhai ardaloedd.

Mae llifogydd mewn nifer fach o gartrefi a busnesau hefyd yn bosib, gyda phosiblrwydd y gallai achosi difrod i adeiladau neu strwythurau.

Fe allai hyd at 50mm o law ddisgyn mewn cyfnod o ddwy i dair awr, meddai'r Swyddfa Dywydd.

Fe fydd y rhybudd dydd Iau yn effeithio ar y siroedd canlynol: 

• Blaenau Gwent
• Caerdydd
• Conwy
• Gwynedd
• Sir Fynwy
• Powys
• Wrecsam
• Pen-y-bont ar Ogwr
• Sir Gâr
• Sir Ddinbych
• Ynys Môn
• Castell-nedd Port Talbot
• Rhondda Cynon Taf
• Caerffili
• Ceredigion
• Sir y Fflint
• Merthyr Tudful
• Casnewydd
• Torfaen