Roedd golygfeydd treisgar ar draws yr Almaen nos Sadwrn gyda gwrthdaro rhwng protestwyr â’r heddlu dros gynnydd mewn costau byw.

Roedd sawl adroddiad am fandaleiddio a lladrata o siopau yng nghanol Frankfurt yn hwyr nos Sadwrn.

Ar wahân i Frankfurt - canolfan ariannol yr Almaen - roedd digwyddiadau o drais yn Berlin, Cologne a Hamburg, gyda'r heddlu'n dweud eu bod wedi defnyddio canon dŵr i wasgaru protestwyr oedd yn targedu gweithwyr brys gyda thân gwyllt, cerrig a photeli.

Ymunodd miloedd â phrotestiadau heddychlon i raddau helaeth yn gynharach yn y dydd. 

Fe'u trefnwyd gan y grŵp ymgyrchu Gen Z regelt - sy'n golygu "Mae Gen Z yn cymryd yr awenau" - i brotestio yn erbyn tanariannu mewn ysgolion, costau byw uchel, toriadau gwariant cyhoeddus a gwasanaeth milwrol.

Mae'r aflonyddwch yn yr Almaen yn dilyn protestiadau torfol tebyg yn Ffrainc, lle roedd mwy na 320,000 o bobl wedi protestio ddydd Sadwrn hefyd.

Wrth iddi nosi, fe wnaeth y gwrthdystiadau droi'n dreisgar yn yr Almaen.

Dywedodd yr awdurdodau yn Frankfurt, Munich a Berlin fod cymaint â 18,000 o brotestwyr, tua hanner yr hyn a amcangyfrifwyd gan y trefnwyr ar eu gwefan. 

Fe ddywedodd llefarydd Gen Z regelt, Lina Friedrich, fod y gwrthdystiadau "i ymladd dros heddwch a rhyddid, yn hytrach na rhyfel a gorfodaeth".

"Yr hyn sydd bwysicaf i ni yw gwell cefnogaeth i'r systemau iechyd ac addysg. Rydym yn erbyn gwasanaeth milwrol gorfodol ac rydym o blaid dosbarthiad tecach o'r baich," meddai.