Mae cwest wedi clywed bod dynes feichiog wedi marw ar ôl anadlu nwy a mwg o dân mewn fan ym Mhrestatyn.

Cafodd y cwest ei agor yn Rhuthun ddydd Llun i farwolaeth Samantha Natalie Phythian, 35 oed, o’r Rhyl.

Bu farw yn y tân ar Ffordd y Gwaith Nwy yn y dref ar 4 Hydref.

Roedd Ms Phythian wedi ei geni yn Sheffield ac nid oedd ganddi gyfeiriad sefydlog.

Dywedodd Uwch Grwner Dwyrain a Chanol Gogledd Cymru, John Gittins, wrth y gwrandawiad bod dyn wedi ei gyhuddo o lofruddiaeth.

“Dan yr amgylchiadau, nid wyf am fynd i lawer o fanylder,” meddai.

Clywodd y llys bod Ms Phythian wedi ei hadnabod gan brofion DNA.

Fe wnaeth patholegydd y Swyddfa Gartref, Dr Brian Rogers, gynnal archwiliad post mortem.

Dywedodd Mr Gittins bod Gwasanaeth Erlyn y Goron wedi gofyn iddo ohirio ei ymchwiliad i farwolaeth Ms Phythian.

“Yn syml, mae’r cwest wedi ei agor a’i ohirio,” ychwanegodd.

Mewn teyrnged iddi, dywedodd teulu Samantha Phythian: "Mae ei marwolaeth drasig a chynamserol wedi gadael ei theulu a'i ffrindiau wedi'u hysgwyd yn llwyr, ac rydym yn ei chael hi'n anodd derbyn colli rhywun a oedd yn golygu cymaint i gynifer.”

Mae Thomas Bell, 38 oed, o'r Rhyl, wedi ei gyhuddo o'i llofruddio.

Fe wnaeth ymddangos o flaen Llys y Goron yr Wyddgrug fore dydd Gwener ac mae wedi ei gadw yn y ddalfa.