Mae miloedd o bobl yn parhau ar goll yn dilyn y llifogydd yn Nepal, sydd wedi lladd mwy na 700 o bobl.

Fe darodd y llifogydd dinistriol ardal Rasuwa yn Nepal, sy’n ffinio â rhanbarth Tibet yn Tsieina, fore dydd Mercher.

Dywedodd awdurdodau Nepal fod y nifer a fu farw erbyn dydd Sul wedi cyrraedd 788, gyda bron i 2,500 o bobl ar goll.

Mae’r ffigyrau diweddaraf gan gyfryngau gwladol Tsieina yn nodi bod 16 o bobl wedi marw a 546 o bobl ar goll yn Tibet.

Dywedodd awdurdodau Nepal fod mwy na 30 o ddinasyddion Prydeinig ymhlith y rhai sy’n parhau ar goll, tra dywedodd cyfryngau gwladol Tsieina ddydd Sul fod 15 o bobl o Brydain ymhlith 261 o dramorwyr ar goll.

Nid yw’n glir faint ohonynt sydd wedi’u cynnwys yn ffigyrau Nepal.

Rhybuddiodd awdurdodau Nepal am lefelau dŵr cynyddol yn Afon Bhote Koshi yn rhanbarth Rasuwa ddydd Sul.

Ddydd Sadwrn, anfonwyd tîm ymateb cyflym o’r DU i Nepal i ddarparu cymorth i Brydeinwyr a’u teuluoedd yno.

Bydd y tîm, sy’n cynnwys staff sydd wedi’u hyfforddi’n arbennig i ymateb i argyfyngau, yn gweithio gyda Llysgenhadaeth Prydain ac awdurdodau lleol.

Mae disgwyl i’r tîm helpu i gydlynu cymorth i Brydeinwyr sy’n cyrraedd y maes awyr neu’n gadael y wlad, cefnogi’r rhai sy’n chwilio am wybodaeth am berthnasau sydd ar goll, a gweithio gydag awdurdodau lleol a’r gwasanaethau brys.

Fel rhan o ymateb ehangach y DU i’r llifogydd, sy’n cynnwys £5 miliwn o gymorth dyngarol, bydd y tîm hefyd yn gweithio gyda theuluoedd yn y DU sy’n poeni am anwyliaid yn yr ardal sydd wedi’i heffeithio.

Pryder am lifogydd

Mae dau yn eu harddegau, merch 13 oed a bachgen 14 oed, ymhlith y 33 o ddinasyddion Prydeinig sy’n parhau ar goll.

Mae eraill sydd â chysylltiadau â’r DU ac sydd ar goll yn cynnwys nyrs y Gwasanaeth Iechyd, offeiriad Hindŵaidd o dde Llundain a oedd yn arwain taith yn y rhanbarth, a pherson 18 oed o Surrey a oedd newydd gwblhau ei arholiadau Lefel A.

Roedd ofnau am fwy o lifogydd wedi rhwystro ymdrechion achub, ar ôl i lyn ffurfio yn sgil cwymp rhewlif.

Fe wnaeth Bishal Nath Upreti, llywydd Canolfan Rheoli Trychinebau Nepal, ddisgrifio’r olygfa fel "tswnami o’r awyr", gyda pentrefi wedi’u "dileu’n llwyr".

Dywedodd swyddogion Nepal fod pontydd wedi’u dinistrio a bod bron i 25 milltir o ffyrdd wedi’u difrodi, gan gymhlethu’r ymdrechion chwilio.

Roedd nifer o’r rhai sydd ar goll wedi bod yn gwneud pererindod i safle sanctaidd Hindŵaidd Mynydd Kailash, meddai trefnydd teithiau The Trekkers’ Society.

Dywedodd y trefnydd fod naw o ddinasyddion Prydeinig ar un o’i deithiau i’r safle ymhlith y rhai sydd ar goll: pedwar dyn, 14, 50, 50 a 54 oed, a phum menyw, 40, 46, 50, 50 a 53 oed.

Dywedodd trefnydd teithiau Kailash Journeys nad oedd wedi gallu dod o hyd i saith o ddinasyddion Prydeinig a oedd wedi bod yn teithio gyda’r cwmni – pum menyw a dau ddyn rhwng 18 a 55 oed.

Dywedodd y Swyddfa Dramor: "Dylai dinasyddion Prydeinig yn Nepal ddilyn cyngor awdurdodau lleol a bod yn ofalus wrth deithio.

"Am gymorth consylaidd, ffoniwch (+44) (0)207 008 5000 neu (+977) (0)14237100."

Llun: Reuters