Mae teyrngedau wedi eu rhoi i fam i efeilliaid o Lanelli sydd â chyflwr hynod brin.

Roedd Lyn Fields yn gofalu am yr efeilliaid Catherine a Kirsty Fields, 32 oed, sy’n byw gyda chyflwr niwrolegol mor brin nes iddo gael ei enwi ar eu hôl: ‘Cyflwr Fields’.

Mae’r efeilliaid yn dioddef o byliau poenus sy'n effeithio ar eu cyhyrau a'u gallu i siarad. Yn 2012 bu’r ddwy yn destun rhaglen ar S4C, Fy Chwaer a Fi.

Dywedodd Nichola Jones, a oedd yn gadeirydd y gronfa oedd yn codi arian i’r chwiorydd, bod eu mam Lyn Fields wedi marw ddydd Mawrth gyda’i gŵr Chris wrth ei hochr wedi brwydr â chanser.

“Fe gyffyrddodd Lyn â chalonnau cymaint o bobl dros y blynyddoedd, a does dim amheuaeth gennym y bydd gennych chi gymaint o atgofion hyfryd i’w rhannu,” meddai.

“Fel y gallwch ddychmygu, mae hyn wedi gadael bwlch enfawr yng nghalonnau pob un ohonom, ond hefyd gymaint o atgofion arbennig y byddwn yn eu trysori am byth.”

Un arall sydd wedi rhoi teyrnged yw Catrin Rhystyd Hughes, oedd yn arfer dysgu yn Ysgol y Strade, Llanelli. 

Dywedodd bod "Lyn yn wraig hyfryd a oedd wedi rhoi ei chyfan oll i ofalu am Kirsty s Catherine ar hyd y blynyddoedd.

"Nhw oedd ei byd. Cawsom amser i'w drysori gyda'r ddwy yn y Strade."

Mae cronfa codi arian oedd ar gyfer y ddwy chwaer wedi ei hail-agor er mwyn cefnogi'r teulu yn ystod y cyfnod anodd hwn.

Llun: JustGiving