Mae Leigh Halfpenny wedi dweud fod rygbi yn "golygu popeth" iddo ar ôl iddo chwarae yng Nghaerdydd am y tro olaf nos Wener. 

Cyhoeddodd Halfpenny ddechrau Mai y bydd yn ymddeol o rygbi ar ddiwedd y tymor.

Llwyddodd Caerdydd i hawlio eu lle yng ngemau ail-gyfle y Bencampwriaeth Rygbi Unedig ar ôl buddugoliaeth yn erbyn y Stormers yn y brifddinas. 

Fe ddaeth Halfpenny ymlaen gydag ychydig funudau o'r gêm yn weddill nos Wener, gyda'r dorf ym Mharc yr Arfau ar eu traed i groesawu un o fawrion rygbi Cymru i'r cae. 

Cafodd ei amgylchynu gan gefnogwyr ar ddiwedd y gêm a oedd yn awyddus i ddangos eu diolchgarwch iddo. 

Wrth siarad ar ôl y gêm, dywedodd ei fod yn "hynod o ddiolchgar. I gael y cyfle yma gan Gaerdydd fel bachgen 18 oed i ddod yma ac atgofion anhygoel ac i allu dod yn ôl i Gaerdydd eleni a gorffen yma o flaen y cefnogwyr ym Mharc yr Arfau, mae'n golygu lot ac mae'n arbennig.

"Dwi wedi fy llethu i fod yn onest dros yr wythnos diwethaf ers y cyhoeddiad, y negeseuon gan bawb, dwi wedi cael fy syfrdanu a dwi mor ddiolchgar i bawb sydd wedi fy nghefnogi ar hyd y daith. 

"Hebddyn nhw, ni fyddai hyn wedi bod yn bosib, felly yn teimlo mor ddiolchgar ac roedd y bechgyn yn anhygoel heddiw, i gael y fuddugoliaeth a chyflawni rhywbeth arbennig a chyrraedd y gemau ail-gyfle. "

Wrth gael ei holi gan Jamie Roberts am yr hyn y mae rygbi yn olygu iddo, dywedodd Halfpenny ei fod yn "golygu popeth."

"Cyn gynted ag y dechreuais i chwarae'r gêm, fe wnes i ddisgyn mewn cariad â rygbi. Wrth dyfu fyny o gwmpas Gorseinon a chwarae gyda nhw, dwi mor ddiolchgar i bawb sydd wedi fy nghefnogi i ar hyd y daith i'r eiliad yma rwan," meddai.

"Dwi mor ddiolchgar am bopeth y mae rygbi wedi ei roi i mi."

Mae Halfpenny wedi chwarae dros 200 o gemau clwb, gan gynnwys dros Gaerdydd a'r Scarlets, a chael dros 100 o gapiau dros Gymru.

Yn ystod ei yrfa fe enillodd 101 o gapiau dros Gymru, gan ennill dwy Gamp Lawn, a sgorio cyfanswm o 801 o bwyntiau dros ei wlad.

Chwaraeodd bedair gêm brawf i'r Llewod a chafodd ei enwi'n chwaraewr y gyfres yn erbyn Awstralia yn 2013.

Dechreuodd a gorffennodd Halfpenny ei yrfa gyda Chaerdydd a chwaraeodd hefyd i Toulon, y Scarlets, y Crusaders a'r Harlequins, gan ennill Cwpan Pencampwyr Ewrop a Chwpan Her yn ystod ei yrfa.