‘Gyda’n gilydd neu ddim o gwbl’ - dyna oedd neges cynhadledd flynyddol ‘Meistroli Amrywiaeth’ gafodd ei chynnal yng Nghaerdydd eleni.

"Dyw amrywiaeth a chynhwysiant ddim i rai, mae o i bawb," dywedodd sylfaenydd y digwyddiad, Bernie Davies, sydd wedi bod yn cynnal y gynhadledd ers pedair blynedd.

Mae’r digwyddiad yn dod â sawl sector yng Nghymru gyda’i gilydd i addysgu, cyd-weithio â chymunedau ac i rannu profiadau er mwyn "sicrhau bod amrywiaeth, cydraddoldeb ac ecwiti yn rhan sylfaenol" o sectorau Cymru.

Image

I’r rheini wnaeth fynychu’r gynhadledd, mae’r sesiynau a’r sgyrsiau yn gwneud iddyn nhw deimlo bod eu lleisiau yn cael eu clywed.

Dywedodd Hodan Hersi, cyd-sylfaenydd Womens Advocacy Network Wales, elusen sy’n rhoi cymorth i fenywod o gefndiroedd amrywiol gyda’u hiechyd a gofal:

“Mae’n wych dysgu am yr hyn mae pobl yn ei wneud a’r gwahanol swyddi a rhannau mae pobl yn eu chwarae. 

"I fi, dwi’n edrych mwy ar ecwiti, i weld sut mae pobl yn cael eu trin yn deg ac yn cael cyfleoedd, mae amrywiaeth yn meddwl y dylai pawb bod yn rhan o’r sgwrs.”

Image

Roedd sawl sesiwn gwahanol yn rhan o’r digwyddiad, o edrych ar ecwiti mewn mamolaeth, i sesiynau STEM i addysgu ar sut i ddefnyddio technoleg i wella mynediad at addysg, i sgyrsiau gydag athletwyr y Gemau’r Gymanwlad am amrywiaeth a chynrychiolaeth o fewn chwaraeon.

Roedd cwmnïau o amryw o sectorau yng Nghymru hefyd yn gweld budd y gynhadledd yn flynyddol.

Mae Gwen Morgan-Evans yn bartner yng nghwmni cyfreithiol Hugh James, ac wedi bod yn mynychu’r digwyddiad ers tair blynedd.

“Beth sy’n arbennig am heddiw yw bod yna lot o fusnesau gwahanol yma…oherwydd, does gan un busnes ddim yr ateb ynglŷn ag amrywiaeth, cynhwysiant ac ecwiti, ond beth sy’n neis ydy dod i wrando ar pobl eraill, dod i ddysgu, rhannu syniadau a ballu," meddai.

Image

“Dwi’n dod adra, yn ôl i’r firm a medru mynd, ‘Ia, dyn ni wedi cael syniadau da heddiw’, rhywbeth o adran hollol wahanol ond mae’r peth yna’n gweithio i’n busnes ni.”

Roedd Dirprwy Brif Weinidog Cymru, Sioned Williams, yn rhan o’r seremoni agoriadol, ac yn canmol amcan y digwyddiad, tra’n cydnabod bod “ffordd i fynd” o ran amrywiaeth a chynhwysiant yn y Senedd. 

‘Mae rhaid i’r Senedd edrych fel y Gymru mae hi’n ei chynrychioli. Mae ‘na beth llwyddiant wedi bod, ond mae yna sicr bell o ffordd i fynd.

"Mae sicrhau cynhwysiant a chwarae teg i bawb yn rhan ganolog o weledigaeth Llywodraeth Cymru," meddai’r Aelod o'r Senedd, sydd hefyd yn Weinidog Cabinet dros Gyfiawnder Cymdeithasol a Chydraddoldeb.

Pan ofynnwyd i’r wrthblaid, Reform UK, a yw’r Senedd fel y mae hi yn cynrychioli’r gymdeithas Gymreig, dywedodd llefarydd ar ran y blaid:

“Mae Plaid Cymru yn honni eu bod yn rhoi Cymru yn gyntaf, ond mae’n ymddangos bod mwy o ddiddordeb ganddyn nhw mewn dilyn ffasiynau eithafol y Chwith. Mae angen iddyn nhw ganolbwyntio ar eu gwaith bob dydd."

“Ein blaenoriaeth ni yw mynd i'r afael â chyflwr ofnadwy gwasanaethau cyhoeddus yng Nghymru, nid bodloni ideoleg 'woke' sydd ddim ond yn gwastraffu amser, egni ac arian.”