Mae’r efeilliaid Emily ac Abigail Roper wedi ennill medalau efydd mewn gymnasteg wrth gynrychioli Cymru yng Ngemau’r Gymanwlad ddydd Llun.

Gyda’r efeilliaid 20 oed yn cystadlu yng nghystadleuaeth y llofnaid (vault), fe lwyddodd Abigail Roper i sicrhau’r trydydd safle gyda sgôr o 13.433 wedi dwy naid, y tu ôl i’r enillydd Lia-Monica Fontaine o Ganada ac Abigail Martin o Loegr.

Fe orffennodd Abigail un safle yn uwch na’i chwaer Emily, a orffennodd yn bedwerydd gyda sgôr o 13.283, gan fethu allan ar fedal.

Ond wrth gystadlu yng nghystadleuaeth y bariau anghymesur (uneven bars) yn ddiweddarach brynhawn Llun, llwyddodd Emily i sicrhau medal ar yr ail gyfle.

Gyda sgôr o 13.666, fe orffennodd yn y trydydd safle, y tu ôl i’r enillydd Kate McDonald o Awstralia, ac Elizabeth Black o Ganada.

Daeth Jemima Taylor o Gymru yn seithfed yn y gystadleuaeth.

Dywedodd Emily ar ôl ennill ei medal bod gweld llwyddiant ei chwaer yn gynharach yn y dydd “wedi fy ngwthio i i wneud yn well”.

“Ro’n i’n siomedig ar ôl y llofnaid. Ro’n i eisiau gwneud e dros fy hunan, a chael y fedal yma, felly rwy’n falch iawn bod hyn wedi digwydd.”

Prif lun: Emily Roper (chwith) ac Abigail Roper (dde) (Llun: Tîm Cymru)