Mae'r cwmni olew rhyngwladol BP wedi cyhoeddi eu ffigyrau ariannol diweddar sy’n dangos elw sylweddol, er gwaethaf newidiadau mewn prisiau ynni a phwysau economaidd byd-eang oherwydd y rhyfel yn Iran.

Dywedodd y cwmni fod eu helw chwarterol wedi aros yn gadarn, wedi’i yrru gan brisiau olew a nwy cymharol uchel a pherfformiad cryf yn eu gweithrediadau masnachu. 

Daw'r cyhoeddiad er i brisiau ynni ostwng o’r hyn a welwyd yn ystod dechrau'r rhyfel rhwng America ac Iran.

Yn ôl BP, mae’r canlyniadau’n adlewyrchu eu strategaeth o gydbwyso buddsoddi mewn ynni traddodiadol gyda datblygu prosiectau ynni adnewyddadwy. 

Fodd bynnag, mae’r cwmni hefyd wedi wynebu beirniadaeth gan ymgyrchwyr amgylcheddol sy’n dadlau nad yw’n symud yn ddigon cyflym i ffwrdd o danwyddau ffosil.

Mae BP wedi cyhoeddi y bydd yn dychwelyd biliynau o bunnoedd i gyfranddalwyr drwy brynu cyfranddaliadau’n ôl - penderfyniad sydd wedi codi cwestiynau ynghylch a ddylai mwy o’r elw gael ei fuddsoddi mewn technoleg glanach.

Ar yr un pryd, mae’r cwmni’n wynebu pwysau gwleidyddol mewn nifer o wledydd, gan gynnwys galwadau am drethi uwch ar elw cwmnïau ynni yn sgil yr argyfwng costau byw.

Dywedodd llefarydd ar ran BP fod y cwmni’n “parhau i ddarparu ynni dibynadwy i gwsmeriaid tra’n buddsoddi’n sylweddol yn y trawsnewid i ynni carbon isel”.