Fe wnaeth dyn o'r Almaen sydd wedi dysgu Cymraeg gloi Eisteddfod Genedlaethol y Garreg Las nos Sadwrn.

Mae Hendrik Robisch yn byw ac yn dod o'r Almaen, ond mae wedi dysgu Cymraeg ac roedd ar Faes y Brifwyl yn Llantwd ddydd Sadwrn. 

Roedd Hendrik yn cymryd rhan yn y Bandioci Gwerin yn y Tŷ Gwerin, ac ef wnaeth gloi'r noson wrth ganu Safwn yn y Bwlch. 

Dywedodd wrth Newyddion S4C: "Dwi jyst wedi neud perfformiad bach yn y Bandioci Gwerin gyda Gwilym Bowen Rhys, ges i’r fraint i bennu’r sioe yn canu Safwn yn y Bwlch ag o’dd e’n hwyl.

"Alla i ddim, ma’ geirie ar goll, o’dd y teimlad jyst mor gryf gyda pawb yn cyd-ganu gyda fi, waw, o’dd e’n pleser pur."

Mae gan Hendrik ddiddordeb mawr mewn ieithoedd. 

"Dwi’n dod o’r Almaen, a dwi wedi dysgu Cymraeg gyda Say Something in Welsh a jyst achos dwi’n caru ieithoedd a dwi wedi darganfod yr iaith Gymraeg a wedi darganfod y  cerddoriaeth Gymraeg," meddai. 

"Dyna fy stori i, dwi wedi dechre dysgu 10 mlynedd yn ôl nawr a felly dwi’n eitha  cyfforddus erbyn hyn ond ie, mae’n brofiad ffantastig bod yma yn yr Eisteddfod."

Doedd Henrik ddim yn ymwybodol iawn o'r Eisteddfod tan iddo ddechrau dysgu Cymraeg. 

"Siŵr o fod wrth ddysgu Cymraeg, mae’r Eisteddfod yn popo lan a dwi jyst wedi dysgu bod e’n  gyfle i gwrdd â phobl a dwi jyst yn cael y cyfle i siarad gyda pobl," meddai. 

"Yn yr Almaen, does dim lot o gyfle i fi siarad gyda pobl heblaw ar-lein ond ma’n tipyn bach o deimlad gwahanol os ma’n cwrdd yn y cnawd."