Yn Llys y Goron Caernarfon, mae Emlyn Jones yn gwadu'r pedwar o gyhuddiadau yn ei erbyn sy'n cynnwys ymosod yn rhywiol, tagu'n fwriadol a threisio. 

 

Mi glywodd y llys fod Emlyn Jones a'r ddynes wedi cyfarfod mewn cyngerdd ar faes yr Eisteddfod ar 6 Awst 2023.

 

Clywodd y llys fod y ddynes wedi gadael y cyngerdd gyda dyn arall a thra'n chwilio am y garafan lle roedd hi'n aros, daeth y ddau ar draws Emlyn Jones unwaith eto. 

 

Ma'r erlyniad yn honni bod y tri wedi cysgu mewn adlen carafan. Roedd y ddynes yn y canol gydag Emlyn Jones ar un ochr a'r dyn arall ar yr ochr arall. 

 

Clywodd y llys fod y dyn hwnnw wedi gadael y babell ar ôl gweld Emlyn Jones yn ymddwyn yn amhriodol tuag at y ddynes.

 

Clywodd y llys wedyn fod y ddynes wedi gofyn i'r diffynydd "Be ti 'di neud?" ac mi ymddiheurodd o.

 

Dywedodd wrtho: "Mi i gysga i'n fama. Cysga di fanna" ac mi ddywedodd "Paid â nghyffwrdd i." 

 

Yn ôl yr erlyniad, mae'r ddynes yn cofio deffro gydag Emlyn Jones arni ac yn cyffwrdd ei bronnau. Clywodd y llys iddi hi geisio ei stopio ac ymladd yn ei erbyn.

 

Pan ddechreuodd ei thagu yn honedig, mi wnaeth hi banicio a methu symud. Ar yr adeg yma, yr honiad ydy iddo gael rhyw efo hi. 

 

Clywodd y llys iddo adael ac mi wnaeth y ferch gloi ei hun mewn car. 

 

Clywodd y llys fod Emlyn Jones wedi dweud eu bod wedi cytuno i gael rhyw efo'i gilydd a nad oedd gwirionedd yn yr honiad ei fod wedi ei threisio. 

 

Mae'n gwadu'r pedwar cyhuddiad yn ei erbyn ac mae'r achos yn parhau.