Mae gyrwyr yn cael eu rhybuddio i ddisgwyl “dydd Gwener gwyllt” gan fod disgwyl i’r teithiau dros ŵyl y banc yr haf greu’r cyfnod prysuraf ar y ffyrdd ers dros ddegawd.

Fe wnaeth yr RAC gyhoeddi’r rhybudd wrth amcangyfrif y bydd 20 miliwn o deithiau hamdden yn cael eu gwneud mewn car rhwng dydd Gwener a dydd Llun 31 Awst.

Roedd rhagor wedi trefnu gwyliau dros ŵyl y banc o ganlyniad i’r tywydd braf yn ddiweddar, medden nhw.

Mae eu hamcangyfrif yn seiliedig ar holi 2,939 o yrwyr yn y DU ar 17 Awst.

Dyma’r ffigwr uchaf ers i’r cwmni gwasanaethau moduro ddechrau dadansoddi cynlluniau teithio gyrwyr dros ŵyl y banc yr haf yn 2015.

Mae dydd Llun 31 Awst yn ŵyl y banc yng Nghymru, yn ogsytal â Lloegr a Gogledd Iwerddon.

Dywedodd yr RAC ei bod yn “debygol y bydd tagfeydd traffig” ddydd Gwener, gyda 4.1 miliwn o deithiau hamdden.

Mae disgwyl 3.8 miliwn o deithiau hamdden ddydd Sadwrn, 3.1 miliwn ddydd Sul a 3.4 miliwn y diwrnod canlynol.

Bryd hynny, bydd pobl ar deithiau dydd yn cystadlu am le ar y ffyrdd gyda phobl sy’n dychwelyd o wyliau byr.

Bydd 5.5 miliwn o deithiau eraill yn cael eu gwneud yn ystod y cyfnod o bedwar diwrnod, ond nid yw’r gyrwyr wedi penderfynu ar ba ddiwrnod yn union y byddant yn teithio, meddai RAC.

Dywedodd Harriet Hernando, llefarydd ar ran gwasanaeth achub yr RAC: “Gyda’r niferoedd uchaf erioed yn mynd i ffwrdd dros ŵyl y banc, mae’n ymddangos bod y tywydd cynnes a sych parhaus wedi calonogi pobl Prydain.

“Mae’n ymddangos hefyd eu bod yn fwy hyderus wrth wneud cynlluniau ar gyfer penwythnos gŵyl y banc ddiwedd yr haf, sy’n aml yn cael ei ddifetha gan y glaw.

“Dylai gyrwyr baratoi ar gyfer dydd Gwener gwyllt ac ystyried cychwyn cyn 10.00 os yw hynny’n bosib.

“Os bydd y tywydd cynnes yn parhau, dylai pobl baratoi rhag ofn iddynt gael eu dal mewn tagfa drwy gario digon o ddŵr.”