Mae Clwb Pêl-droed Southampton wedi cael eu diarddel o'r gemau ail gyfle ar ôl cyfaddef eu bod nhw wedi ysbïo ar dri chlwb yn ystod tymor y Bencampwriaeth.

Mae Clwb Pêl-droed Middlesbrough, a gollodd yn erbyn Southampton yn y rownd gynderfynol, wedi cael eu derbyn yn ôl i'r gystadleuaeth a byddant nawr yn herio Hull City am le yn Uwch Gynghrair Lloegr.

Mae'r EFL wedi cyhuddo Southampton o wylio sesiynau hyfforddi rhwng Oxford United ac Ipswich Town, yn ogystal â ffilmio Middlesbrough wrth iddynt baratoi ar gyfer cymal cyntaf eu rownd gynderfynol yn y gemau ail gyfle ar 7 Mai.

Mae'r comisiwn disgyblu annibynnol hefyd wedi ddiddymu pedwar pwynt oddi ar Southampton yn y Bencampwriaeth ar gyfer y tymor nesaf.

O ganlyniad i gael eu diarddel, bydd Southampton yn colli’r cyfle i chwarae mewn gêm hollbwysig, gan y bydd enillwyr rownd derfynol y gemau ail gyfle yn sicrhau o leiaf £110 miliwn mewn refeniw darlledu gan yr Uwch Gynghrair.

Bydd y rownd derfynol yn cael ei chynnal ddydd Sadwrn yn stadiwm Wembley, Llundain.

Yn ôl yr EFL, cyfaddefodd Southampton i "dorri nifer o amodau" yn ymwneud â ffilmio eu gwrthwynebwyr yn hyfforddi cyn gemau heb awdurdod.

"Cafodd Southampton eu cyhuddo gyntaf ddydd Gwener 8 Mai, gyda chyhuddiadau pellach yn cael eu cyhoeddi ddydd Sul 17 Mai mewn cysylltiad â thorri rheolau ychwanegol yn ystod tymor 2025-26.

"Cododd y cyhuddiadau ychwanegol hynny o faterion a gafodd eu nodi ar ôl i'r achos cychwynnol yn ymwneud â Middlesbrough gael ei gychwyn.

"Fe wnaeth Southampton gyfaddef eu bod wedi torri rheoliadau sy'n ei gwneud yn ofynnol i glybiau weithredu gyda'r ffyddlondeb mwyaf ac yn gwahardd arsylwi sesiwn hyfforddi clwb arall o fewn 72 awr i gêm.