Mae corff dyn a aeth ar goll ar ôl mynd i draeth ym Mhwllheli wedi cael ei ddarganfod yn Aberystwyth.

Dywedodd Heddlu Gogledd Cymru eu bod nhw wedi cael eu galw i'r traeth yn Aberystwyth am 12:30 ddydd Sul.

Fe gafodd y corff ei adnabod fel Connor Parfitt, un o'r dynion a aeth ar goll ar ôl mynd i draeth wrth ymyl gwersyll Hafan y Môr, Pwllheli, yng Ngwynedd, gyda caiacs aer am 18:30 brynhawn dydd Mawrth diwethaf.

Mae ei deulu a'r crwner wedi cael gwybod.

Mae ail ddyn, Simon Wilson, yn dal i fod ar goll ac mae swyddogion yn parhau i gefnogi ei deulu.

Image

Dywedodd y Prif Arolygydd Stephen Pawson o Heddlu'r Gogledd fod y llu'n parhau i apelio am wybodaeth i helpu i ddod o hyd i Mr Wilson.

"Mae fy meddyliau yn parhau gyda theuluoedd Connor a Simon yn ystod y cyfnod hynod anodd yma.

"Nid dyma'r canlyniad roeddem yn gobeithio amdano, gan gynnwys y timau oedd yn rhan o'r chwilio.

"Hoffwn ddiolch i'n partneriaid, gwirfoddolwyr ac aelodau'r cyhoedd a wnaeth gynnig cymorth dros y chwe diwrnod diwethaf.

"Rydym yn parhau i apelio am unrhyw wybodaeth neu i unrhyw un sydd wedi gweld Simon, i gysylltu â ni a dyfynnu'r cyfeirnod O120829."